CMC ta reforsá su departamentu di Emergensia pa motibu di COVID-19

CMC ta reforsá su departamentu di Emergensia pa motibu di COVID-19

Pa por keda sigurá kuido pa pashènt, entrante e siman aki Curaçao Medical Center (CMC) lo reforsá su departamentu di emergensia pa kompensá pa e miembronan di personal ku a keda infektá ku COVID-19. Den kolaborashon ku Boneiru, AMI (tím di medikonan di Merka) i tím di defensa Hulandes, lo bin sosten pa CMC durante un temporada no definí. Na total 7 miembro di personal di CMC a keda infektá ku COVID-19, di kual 3 ta di e departamentu di Emergensia. Entretanto un di e 7 personanan a rekuperá.

CMC ta keda enfatisá e importansia di mantené protokòl di COVID-19 paden di hòspital i ta supliká tur hende pa mantené nan mes na reglanan di distansia sosial i higiena pafó di hòspital den bida diario. CMC lo proveé tur trahadó ku ta bin den kontakto direkto ku pashènt di un tapa boka di akuerdo ku protokòl di COVID-19. Ademas, miembronan di kuido i tambe esnan ku no ta bin den kontakto direkto ku pashènt, lo risibí un “Face Shield”.

Tur sita ta sigui normal, pero CMC lo sigui apliká medida nesesario pa seguridat di nos pashèntnan i nos personal. E reglanan ta enserá ku mester bisti tapa boka na momentu ku drenta hòspital i no ta permití akeso sin un sita. E úniko eksepshonnan ta pa personanan ku ta nesesario pa guia pashènt of kasonan ku a risibí eksepshon di speshalisa of hefe di enfermeria.

Entrada di hòspital

  • Entrada ta solamente na banda wèst (banda di KFC) i via garashi di parker
  • Pa emergensia por drenta di entrada na nòrt (Hamelbergweg/Roodeweg).
  • Lo tin kòntròl estríkto na entrada, pues mester di un ID balido pa por drenta.

Manera ta konosí, na e momentunan aki CMC no tin nuin pashènt ku COVID-19 na hòspital.