Corona vírùs (COVID-19) Update

25 Apr, 2020 – 1.41 p.m.

CMC ta kontinuá kuido elektivo entrante di djaluna 20 di Aprel

Den palabrashon ku Ministerio di Salubridat, Naturalesa i Higiena, Curaçao Medical Center lo kuminsa ekstende kuido elektivo entrante djaluna 20 di aprel. Esaki ta nifiká ku lo bai kuminsá ku sitanan di poli ku a keda kanselá pa motibu di e situashon di COVID-19. Lo kontinuá den forma limitá ku sitanan i lo akomodá mas tantu pashènt posibel teniendo e reglanan di distansia sosiál na kuenta. Departamentu di Poliklinika di CMC lo tuma kontakto ku pashèntnan entrante djaluna pa plania sitanan personal òf si ta posibel via telefòn. Si un pashènt mester wòrdu akompañá durante su sita, esaki ta posibel ku solamente ku ún adulto pa pashènt i preferibelmente un miembro di famia. Tene kuenta ku lo tin kontròl di ofisialnan di seguridat na entrada (parti di garashi) i ta pidi pa yega 15 minüt promé ku orario di e sita pa por atendé tur pashènt na e orario stipulá den nan sita. Si e pashènt mester saka un karchi digital (no tin esun nobo di CMC), mester yega 30 minüt promé ku orario di e sita pa por duna sufisiente tempu pa traha e karchi. Pa bishitá pashènt ku ta kedando den hòspital, CMC lo permití solamente un bishita pa pashènt pa dia entre 11.30am i 12.30pm. E reglanan nobo lo keda na vigor te próksimo aviso. Yuda nos yudabo mas miho. Si bo tin kualke keho tokante nos servisio, nos ke tende bo bo. Tuma kontakto ku departamentu di Keho di CMC na 745-0000 ext. 1260 i 1261 òf manda un email na: klachten@cmc.cw.

Preguntanan hopi hasí

CMC ta prepará?

Si. Nos ta trata pashèntnan ku malesa di infekshon i malesanan kompliká regularmente i nos tin protokòl estrikto pa prevenshon di infekshon. Nos spesialistanan riba tereno di malesanan di infekshon ta bon eduká i tin kontakto kontinuo ku funshonarionan di salubridat lokal. Tambe nan ta sigui e desaroyonan di aserka.

Kiko CMC ta hasi pa protehá e pashèntnan?

Nos lo isolá pashèntnan ku riesgo haltu di tin e COVID-19.

Mi mester keda ku mi sita médiko?

Teniendo na kuenta nos situashon lokal di Corona vírùs (Covid-19), nos a disidí di kanselá sirugía elektivo i ku no ta urgente ku tabata planiá pa tuma lugá na CMC den e próksimo siman. Lo kontinuá ku tur kuido esensial i agudo manera diálisis, kimoterapia, radioterapia, onkologia, frakturashon i parto. Nos a tuma e desishon akí pa yuda nos manehá demanda i sigurá ku nos ta sigui duna kuido seif i efektivo na nos pashèntnan. Nos tím lo tuma kontakto ku tur pashènt ku lo ser afektá dor di e kambionan akí. Ta tratando solamente kasonan di urgensia i esnan ku ta agudo i essensiál. Tur pashènt ku tin sita lo wòrdu yamá i lo tin sierto sita ku por bai via telefòn mes.

Nos tim ta eksplorando alternativanan pa pashènt ku mester di un sita, kual lo inkluí sita telefóniko. Nos lo tuma kontakto ku tur pashènt ku lo ser afektá pa e kambionan.

Ta pèrmití bishita?

Entrante di djaluna, 30 di mart, no ta pèrmití bishita na Curaçao Medical Center. Esaki ta pa yuda protehá nos pashèntnan, miembronan di famia i nos personal di kuido kontra di plamashon di COVID-19. Por hasi eksepshon (ku outorisashon di speshalista) den solamente den e siguiente kasonan:

  • Hospitalisashon di miembro di edat (un máksimo di 1 miembro di famia pa dia).
  • Pashènt terminal (máksimo di 1 miembro di famia pa dia).
  • Pashèntnan ku mester di ayudo ku komunikashon, pa tuma desishon, òf ku mobilidat (máksimo 1 miembro di famia pa dia).
  • Pashènt ku ta duna lus (máksimo di 1 miembro di famia òf persona di konfiansa pa sosten pa dia).
  • E salú i seguridat di pashènt, nan famía i nos personal ta keda e prioridat mas haltu pa CMC.

Kon peligroso COVID-19 ta?

Mayoría persona ku tin e vírùs di corona, lo haña esaki den forma leve. Meskos ku influenza (grip) esaki por kondusí den sierto kaso na malesanan severo manera pulmonía i tin bia asta morto. Ansianonan i personanan ku ya tin malesa ta e grupo mas vulnerabel.

Kon e malesa ta keda transmití?

COVID-19 ta keda transmití entre personanan ku ta den kontakto di aserka ku otro (mas o ménos dos meter). E vírùs por keda transmití den gota ku ta kai den airu ora nister òf tosa. Tambe bo por haña e vírùs ora bo mishi ku algu kaminda e vírùs a plama i despues bo mishí ku bo kara, wowo òf boka.

Kon mi por tene mi mes salú?  

Tin sierto pasonan ku bo por tuma pa keda salú:

  • Laba bo man regularmente i durante 20 sekònde ku awa i habón òf usa handsanetizer ku un base di alkohòl.
  • Tosa den bo èlebog of den un tissue i no den bo man. Benta e tissue afó despues.
  • Usa habón pa limpia i desinfektá areanan ku ta hopi usá na kas, trabou i na skol.
  • No mishi ku bo wowo, nanishi i boka.
  • Evitá kontakto di aserka ku hende malu.
  • Si bo ta malu, keda kas; no bai di biahe i no bai trabou.
  • Praktiká kustumbernan saludabel; drumi sufisiente, praktiká deporte, dominá bo strès, bebe hopi líkido i kome saludabel.

Mi mester bisti un máskara na mi kara?

Pa mayoría persona ku ta di bon salú GGD no ta rekomendá pa bisti un máskara na kara.

Kiko e síntomanan ta?

Según e informashon di GGD aktual e síntomanan por tuma lugá entre dos pa 14 dia despues di a kontagiá e vírùs. Síntomanan ta entre otro keintura, tosamentu i problema respiratorio. E informashon akí ta basá riba lokual a keda konstatá ku otro vírùs i por kambia asina tin mas informashon tokante COVID-19.

Kiko mi mester hasi si mi ta malu?

Si bo a bishitá un país ku a keda kalifiká komo un país di riesgo pa GGD òf bo tatin kontakto ku un persona kaminda a konfirmá ku e tin COVID-19 (vírùs di corona), bo tin keintura i/òf problema ku halamentu di rosea, tuma kontakto ku e dòkter di kas pa informashon tokante tèst i tratamentu. No bai poli sin tuma kontakto ku bo dòkter di kas promé. Por yama e hòtline di GGD tambe: 9345 (24 ora pa dia, 7 dia pa siman).

Kon bo ta keda diagnostiká i tratá?

Tuma kontakto ku bo dòkter di kas si bo ta eksperensiá síntomanan di un grip of fèrkout. Si bo tin problema respiratorio i/òf keintura i bo a biaha pa eksterior, ÒF bo tatin kontakto ku un persona kaminda a konfirmá ku e tin COVID-19, tuma kontakto ku bo dòkter di kas pa instrukshon tokante tèst i tratamentu. GGD ta konsehá bo kon bo por haña tratamentu i ta tuma kontakto ku Curaçao Medical Center dirèkt.

COVID-19 ta un problema di salú mundial ku ta desaroyá rápidamente. Pa informashon mas resién di e siguiente organisashonnan:

Tambe wak