Despues di warda hopi aña, porfin ta asina leu, nos hòspital nobo tei: Curaçao Medical Center. Un hòspital state-of-the-art ku un kuido médiko spesialisá amplio.
Kuido di pashènt den Curaçao Medical Center ta sentral i koordiná, esaki ta nifiká ku tur aktividat den e hòspital ta konektá na otro pa kual motibu e pashènt ta haña un kuido optimal i integral. Di e forma akí ta krea espasio pa apliká alternativa konfiabel i medisina adishonal tambe. Dor di esaki Curaçao Medical Center ta e ofresedó di mas importante di tantu kuido médiko spesialisá komo kuido klíniko altu na Kòrsou.
Ademas nos ke traha di forma sostenibel, kumpli ku e eksigensianan internashonal di kalidat i normanan di seguridat den kua e pashèntnan i seguridat ta para sentral for di un posishon finansiero saludabel pa aportá aktivamente na kontinuashon di desaroyo di Kòrsou.
Aparte di esei nos ta realisá algun funshon altu pa kuido klíniko manera hematologia – onkologia, radioterapia, sirugia neurológiko/ neurologia, laboratorio di kateterisashon, kuido neonatal intesivo i kardeologia pa mucha.
Den e hòspital nobo nos ta traha ku ruta pa asina hasi e proseso pa bo por yega na un departamento mas fásil. Si dado kaso bo bishitá hòspital pa un tratamantu òf pa un atmishon e ora ei bo mester sigui un ruta pa por yega na bo departamento.
Mishon
Nos Mishon ta pa brinda kuido hòspitalario di kalidat haltu pa Kòrsou i nos region.
Nos slogan ta ‘Sirbi ku Amor’. Nos ta traha ku amor i respèt pa restourá, mantené i fortifiká e kalidat di bida di nos pashèntnan.
Nos vishon
Nos ta duna kontenido na nos mishon komo hòspital general ku atenshon hospitalario básiko i di nivel altu. Alabes nos tin atenshon pa diferente disiplina ku un kuido nunka bisto aki na Kòrsou i ku ta duna edukashon médiko i ta hasi tambe investigashon sientífiko.
Nos ta aspirá pa por tin un bon kooperashon i sinkronisashon ku:
- Otro hòspital den region i na Hulanda
- e promé liña (dòkter di kas i partera)
- i tambe e di tres liña manera e kuido na kas i kasnan di kuido.
Den kooperashon ku Advent Hospitaal nos ta ofresé e komunidat di Kòrsou un pakete kompletu di kuido médiko spesialisá. Ademas Curaçao Medical Center tin un aliansa ku sentro médiko universitario, entre nan e Universitair Medisch Centrum Groningen i Erasmus Universitair Medisch Centrum na Hulanda i tambe ku e Fundación Cardioinfantil na Bogotá, Colombia.
Embahador di Amor
Nos embahadornan ta engrandesé e kuido na nos pashèntnan i nan famia. Komo parti di nos tim di CMC, e embahador ta asistí e staf profeshonal (enfermera i médikonan) pa garantisá ku e komodidat di e pashènt, su famia i bishitante ta keda realisá durante su hospitalisashon. Si un pashènt tin pregunta, feedback òf un keho ku e no tatin e oportunidat pa duna un enfermera òf un dòkter, semper e por akudí na e ‘Embahador di Amor’.
Boluntario
Boluntario na CMC
Nos boluntarionan ta un parti vital di e mishon di CMC pa brinda e mihó kuido na tur pashènt. Danki na e dedikashon di nos boluntarionan, nos por realisá e prioridat di CMC, ku ta pa pone e nesesidat di e pashènt na promé luga.
Tur dia boluntarionan di tur edat ta pasa varios ora ku pashènt i bishitantenan den CMC. Boluntarionan ta hunga un ròl esensial den e diferensia pa pashènt i bishitantenan. Nan ta laga e pashènt i bishitante sinti’é na kas i ta brinda servisionan ku otro ora lo no ta disponibel.
Bo ke bira un boluntario na CMC?
Trabou di boluntario ta yenabo ku un sentimentu di satisfakshon enorme. Den e proseso di duna, lo bo risibí hopi mas. Pa nos hòspital, kaminda nos tin atenshon amplio pa nos pashèntnan, nos ta buskando individuonan ku nos por konta riba dje, ku tin kompashon, komprenshon, bon abilidat komunikativo i por hasi tur tarea den nan area di servisio. Tin hopi oportunidat, inkluso asistí pashènt i nan famia, duna informashon i ta un fuente di motivashon na kada momentu ku un persona mester di esaki.
Personanan di tur ámbito di bida ta hasi trabou di boluntario na CMC. Serka nos nan ta eksperiensiá kompaño i un sentido di satisfakshon den e proseso di yuda otro, kumpliendo ku e balor primario di CMC: e nesesidatnan di e pashènt ta na promé lugá.
Tuma kontakto ku nos na communication@cmc.cw pa mas informashon.
Por fabor manda bo informashon pa bira un boluntario na CMC:
Trahadó den kuido médiko ku ke regalá tempu durante e krísis di COVID.
Boluntario general ku tin 3-4 ora pa siman pa dediká den un término mas largu na CMC. Trabou ta enserá guia pa pashènt.
