Urologia

Curaçao Medical Center ta trata tur kondishon urológiko; di un infekshon komun di trakto urinario pa kansernan kompleho di e blas, nir i trakto geniturinario. Ku un tim di urólogo bon kalifiká, nos ta sirbi tantu hende hòmber komo hende muhé ku ta bin CMC pa kuido urológiko. I pa kondishonnan ku ta rekerí mas spesialidat, nos tim por kolaborá ku otro tim na CMC, manera por ehèmpel onkologia i ginekologia.

Na CMC nos tim di urólogonan ta brinda tratamentunan kirúrgiko i no-kirúrgiko pa problemanan urológiko na un sitio kaminda tambe tin varios opshon avansá pa tèst i diagnostiká e pashènt. Di imahen i tèst te tratamentunan médiko i sirugianan minimo invasivo; nos ta ofresé tur lokual un pashènt por tin mester i kada plan di tratamentu ta trahá na midí i ta reflehá e nesesidatnan spesífiko di kada pashènt. Tambe nos ta dediká na edukashon di nos pashèntnan; nos ta traha di aserka ku kada individuo ku nos ta trata pa yuda nan tuma e mihó desishonnan tokante nan salú urológiko.