Terapia di oksígeno hiperbáriko ta enbolbí respirashon di oksígeno puru den un kamber yená ku preshon. Esaki ta un tratamentu hopi konosí pa trata malesa di dekompreshon ku por surgi durante di sambuyámentu. Otro kondishonnan ku ta keda tratá ku terapia di oksígeno hiperbáriko ta inkluí infekshonnan serio, airu den e ardunan i heridanan ku no ta kura komo resultado di diabétis òf un herida di radiashon.
Den un druktank e preshon di airu ta oumentá te tres bia mas tantu ku e preshon di airu normal. Bou di e sirkunstanshanan aki bo pulmonnan por tuma mas oksígeno ku normalmente lo ta e kaso.
Bo sanger ta pasa e oksígeno aki den hinter bo kurpa. Esaki ta yuda kombatí bakteria i ta stimulá sierto supstansha ku yama faktor di kresementu i stamsèl ku ta promové kurashon.
Terapia di Oksígeno Hiperbáriko i dikon ta apliká e tratamentu aki.
Tehido di bo kurpa mester di un suministro adekuá di oksígeno pa funshoná. Ora bo tehido ta leshoná, e ta rekerí aun mas tantu oksígeno pa sobrebibí. Terapia di oksígeno hiperbáriko ta oumentá e kantidat di oksígeno ku bo sanger por transportá. Un oumento di oksígeno den bo sanger temporalmente ta restourá e nivel normal di gas den bo sanger i funshonamentu di bo tehido pa promové kurashon i kombatí infekshon.
Terapia di oksígeno hiperbáriko ta wòrdu usá pa trata varios kondishon médiko i institutonan médiko ta usa e tratamentu na diferente manera. Bo dòkter por sugerí e terapia aki si bo tin un di e siguiente kondishonnan:
Tratamentu i Kondishonnan
- Anemia, severo
- Apsès na serebro
- Airu den bo ardunan
- Kimá
- Malesa di Dekompreshon
- Intoksikashon pa Monoksido di Karbono
- Leshon aplastante
- Surdu, diripiente
- Gangrena
- Infekshon di kueru òf wesu ku ta kousa morto di tehido
- Heridanan ku no ta kurá, por ehèmpel pa motibu di diabétis
- Herida di Radiashon
- Transplantashon di kueru ku riesgo di morto di tehido
- Pèrdida di bista, diripiente i sin doló
Programa i Servisionan di druktank i Kuido di Herida
-
Kiko bo por spera
- Durante terapia di oksígeno hiperbáriko
Terapia di oksígeno hiperbáriko normalmente no ta rekerí hospitalisashon. Si ya kaba bo ta den hòspital i mester di terapia di oksígeno hiperbáriko, bo ta keda den hòspital pa e tratamentu.
- Nos druktank na CMC ta diseñá pa akomodá 10 persona.
Bo ta sinta den un druktank meskos ku bo ta sinta den un avion, pero riba un stul komfortabel ku sufisiente espasio pa bo rek bo pianan i tambe tin e opshon pa bo wak un pelikula òf skusha musik. Pashèntnan tambe por drumi riba un kama, dependé nan kondishon. Durante e tratamentu e preshon di airu den e kamber ta dos te tres bia mas tantu ku e preshon normal. E oumento di preshon aki ta krea un sintimentu temporal di plenitut den bo oreanan, meskos ku bo lo eksperiensiá den un avion. Bo por kita e sentimentu aki dor di hap òf guli. Pa mayoria kondishon, terapia ta dura mas o menos dos pa tres ora. Miembronan di e tim di kuido di e druktank lo monitoriá bo situashon durante tratamentu.
- Despues di terapia di oksígeno hiperbáriko
Bo por sinti un tiki kansá òf eksperiensiá hamber despues di e tratamentu. Bo no ta keda limitá den aktividatnan normal.
- Resultado
Pa benefisiá di e terapia di oksígeno hiperbáriko, lo bo mester mas di un seshon. E kantidat di seshon ta dependé di bo kondishon médiko. Sierto kondishon, manera por ehèmpel intoksikashon pa monoksido di karbono, por keda tratá den tres seshon. Otro kondishonnan, manera por ehèmpel heridanan ku no ta kura, por rekerí entre 20 pa 40 tratamentu.
Terapia di oksígeno hiperbáriko por efektivamente trata malesa di dekompreshon i intoksikashon severo pa monoksido di karbono.
Pa efektivamente trata otro kondishon, terapia di oksígeno hiperbáriko ta keda usá komo parti di un plan amplio di tratamentu i ta tuma parti huntu ku otro formanan di terapia i medikashon ku ta kuadra ku bo nesesidatnan individual.
Spesialista Druktank i Kuido di Herída
