E spesialismo di Medisina Interno ta dediká na e diagnostiko, tratamentu i maneho di malesanan ku ta afektá órganonan interno di un adulto. E spesialistanan aki, konosí komo internista, ta profeshonalnan ekipá pa trata un variedat di kondishonnan médiko. Nan ta enfoká riba prevenshon, diagnostiko i tratamentu di malesanan ku ta impaktá e órganonan interno i nan sistemanan ku ta interkonektá. Si ta nesesario, pashèntnan por wòrdu referí na un internista ku ekspertisio spesífiko.
Spesialidatnan den Medisina Interno
- Diabétis (malesa di suku)
- Endokrinologia (malesanan metabóliko)
- Malesanan Infeksioso
- Geriatria (medisina pa pashèntnan di edat)
Konsultá un Internista pa e siguiente kondishonnan
- Anemia i kansansio persistente
- Maneho di diabétis
- Wesu ta bira debil of fragil (osteoporósis)
- Problemanan di memoria, lubidá i demensia
- Kaida òf episodionan di desmayo
- Polifarmasia (uso di vários remedi)
- Vulnerabilidat general òf salú debilitá
- Abnormalidat di tiroide
- Nir no ta funshoná
- Preshon haltu òf nivelnan di kolesteròl haltu
- Pèrdida di peso ineksplikabel
- Keintura i malesanan infeksioso
Kiko por spera durante bo bishita
Durante bo sita, e internista lo hasi un konsulta detayá i un eksaminashon físiko. Si ta nesesario, por hasi tèstnan adishonal manera analisis di sanger òf saka potrèt. Unabes ku tur resultado ta disponibel, e internista lo kolabora ku bo pa desaroyá un plan di tratamentu personalisá.
Nota Importante: Por fabor trese un lista aktualisá di bo remedinan na kada sita. Informá bo dòkter di kualke kambio resien den bo régimen di remedi pa garantisá e mihó kuido.
Spesialista Medisina Interno
Dr. Jeanne Koeijers
Dr. Jeanne Koeijers ta un Internista i Intensivist na Curaçao Medical Center (CMC), spesialisá den kuido di medisina interno agudo i kompleho. Su áreanan di enfoke ta, kuido agudo, kuido di pashènt holístiko, i edukashon médiko.
El a spesialisá den medisina interno i kuido intensivo na Maastricht University Medical Center (Maastricht UMC+), Máxima Medical Center na Eindhoven i Zuyderland Medical Center na Heerlen.
Dr. Koeijers ta trahando for di aña 2007 na Kòrsou, inisialmente na SEHOS. Despues di e transishon di SEHOS pa CMC dia 15 di novèmber 2019, el a sigui ku su trabou na CMC.
Ku dedikashon i pashon, Dr. Koeijers ta kontribuí na duna kuido di kalidat haltu sentral riba e pashènt i na fortalesé kuido di salú pa e komunidat. Ademas di su trabou klíniko, e ta komprometé na edukashon i kompartí konosementu ku futuro profeshonalnan di kuido di salú.
Dr. Diederik Van de Wetering
Dr. Diederik Van de Wetering ta un Internista-Infektiólogo. El a kuminsá su estudio na University Medical Center na Groningen.
Despues, el a sigui su estudio na Leiden University Medical Center kaminda el a risibí su PhD.
Na 2013, Drs. Van de Wetering a yega Kòrsou i a Kuminsá traha na St. Elisabeth Hospital. Na 2019 el a hasi e traspaso pa CMC.
Ku ekspertisio den medisina interno general i malesanan infektivo, Dr. Van de Wetering ta trese gran konosementu i eksperensia pa e tim na CMC.
Dr. Esther Rooijakkers
Dr. Esther Rooijakkers ta un Internista-Infektiólogo ku enfoke riba Malesanan Infektoso. El a terminá su estudio na Maastricht University Medical Center.
Dr. Rooijakkers ta biba na Kòrsou i traha na Curaçao Medical Center (CMC) for di kuminsamentu di 2019.
Komo internista, Dr. Rooijakkers ta trata pashèntnan ku ta varia di 18 pa 100+ aña di edat, kada un ku un variedat grandi di keho di salú. Sea di pashèntnan di poliklínika òf e departamentu di emergensia, e ta un reto pa identifiká e kousa i konekshon di e problemanan aki. E ta kere ku faktornan ambiental hopi bia ta hunga un ròl mas grandi den salú ku hende ta realisá. Miéntras ku remedi tin bia ta nesesario, kambionan di estilo di bida hopi bia ta mesun importante, manera den kaso di diabétis. Komo un spesialista di malesanan infesioso, e ta traha tambe ku malesanan manera COVID, dengue i resistensia na antibiótika. Pafó di trabou, e ta gusta kana òf snòrkel rònt di Banda Bou.
Dr. Rachidah Griffith
Dr. Rachidah Griffith ta un Internista-Endokrinólogo ku un enfoke riba Medisina Interno i Endokrinologia. El a terminá su edukashon na Sentro Médiko VU, ku awor ta parti di Amsterdam UMC.
Dr. Griffith ta trahando for di 2013 na Kòrsou komo internista-endokrinologo. E ta spesialisá den desbalansa hormonal i e sistema endokrino, enfoká riba diagnostiká i trata kondishonnan manera diabétis, trastornonan di tiroides, i desbalansa hormonal. E ta traha huntu ku otro spesialistanan pa garantisá ku pashèntnan ta risibí e mihó kuido posibel i ta wòrdu guiá pa un bida saludabel i balansá.
Dr. Judella Daal
Dr. Judella Daal ta Geriatra Klíniko na Curaçao Medical Center (CMC) ku eksperensia signifikante den kuido di adultonan di edat. El a studia medisina na Universidat di Radboud i a kompletá esaki na aña 1983. El a spesialisá den Geriatria Klíniko na vários hòspital na Hulanda. Kuminsando na aña 2000, el a traha komo Geriatra klíniko na Slotervaartziekenhuis na Amsterdam, VU Medical Center (VUMC) i Dijklander Ziekenhuis na Hoorn i Purmerend. Entrante aprel 2026, e ta forma parti di CMC, kaminda e ta sigui duna kuido geriátriko di kalidat haltu. Den su práktika, edat kronológiko no ta semper e faktor prinsipal, edat biológiko i estado di salú en general hopi bia ta mas importante.
Konsekuentemente, pashèntnan mas yòn ku 65 aña tambe por wòrdu tratá den geriatria, partikularmente ora nan tin múltiple kondishonnan médiko òf kompleho. Dr. Daal ta adoptá tratamentu holístiko pa kuido di pashènt, konsiderando no solamente salú físiko pero tambe kondishonnan kognitivo i mental, tambe kon esakinan ta afektá e funshonamentu diario di un pashènt. Sirkunstansianan sosial tambe ta forma un parti esensial di su evaluashonnan. Su interesnan spesial ta inkluí prevenshon di kai, trastornonan kognitivo, abuzu di hende grandi i maneho di kuido.
Enfermeronan Spesialisá Medisina Interno
Jennely Christopher
Funshon: Enfermera di Diabétis
Áreanan di Enfoke: Diabétis Mellitus i sosten den kaso di posibel komplikashon.
Edukashon: Akademia di Amstel, VUmc
Na CMC for di: 2019
“Mi pashon ta guia pashèntnan pa un mihó bida ku diabétis dor di duna konosementu i sosten.”
Darrel Obispo
Funshon: Enfermero di Diabétis
Áreanan di Enfoke: Eduká i guia pashèntnan ku diabétis mellitus.
Edukashon: Akademia di Amstel, VUmc
Na CMC for di: 2019
“Un enfermero di diabétis ta un guia riba e kaminda pa un bida mas saludabel, brindando empatia i konosementu.”
Sterre Noordhoek
Posishon: Enfermera Geriátriko Konsultativo
Áreanan di Enfoke: Trastornonan kognitivo, prevenshon di fraktura i kaimentu, pèrdida di peso, investigashon i tratamentu di osteoporosis, polifarmasia, kuido despues di atmishon i mehorashon di kalidat.
Edukashon: Bachelor den Enfermería na Hogeschool van Amsterdam (HvA) i Ambulancezorg, BAZ (Kuido Agudo Bàsiko) i Geriatria na Akademia di Amstel.
Na CMC for di: 2021
“Mi ròl no ta solamente pa duna kuido pero pa empoderá hende den nan vulnerabilidat i sostené nan den nan retonan personal.”
Athalia Alberto
Posishon: Enfermera di Infektiologia
Áreanan di Enfoke: Guia i sostené pashèntnan durante nan diagnósis.
Edukashon: New Horizons, IFE, Edukashon di Virologia
Na CMC for di: 2017
“Konosementu ta poder.”