Intensive Care

Pashèntnan ku tin un malesa severo, ku a sufri un aksidente serio òf ku ta rekuperando di un operashon grandi, ta keda tratá den ICU.

TRAHA SITA

Na Curaçao Medical Center nos tin departamentonan ku ta konsistí di un Intensive Care Unit (ICU) ku 9 kama, inkluso 3 kamber di isolashon i un Medium Care Unit (MCU) ku 9 kama, inkluso tres kamber di isolashon. Pashèntnan ku tin un malesa severo, ku a sufri un aksidente serio òf ku ta rekuperando di un operashon grandi, ta keda tratá den ICU. E funshonnan vital di e pashènt, manera respirashon, sirkulashon i konosementu mester keda monitoriá intensiviamente, sostené òf den sierto kaso asta remplasá. Kualke kambio den kondishon di e pashènt ta keda detektá mesora riba e monitòr. Asina kòntròl, opservashon i tratamentu por keda ahustá rápidamente. E Medium Care Unit ta sirbi komo un lokalidat intermedio kaminda pashèntnan ta keda risibí kuido spesialista despues di un operashon grandi òf malesa, promé ku nan wòrdu transferí pa un kamber di hòspital regular.

E tim di ICU na Curaçao Medical Center ta multidisiplinario i ta konsistí di enfermeranan spesialisá den kuido intensivo, médikonan i spesialistanan ku sa kon pa brinda kuido krítiko pa pashèntnan ku un variashon di kondishonnan médiko, kirúrgiko i troumátiko.

E departamento di ICU na Curaçao Medical Center ta un di e areanan funshonal mas krítiko di e hòspital. Nos ICU ta un area grandi steril ku un konsentrashon haltu di aparatura spesialisá, tékniko i pa monitoriá, ku ta nesesario pa pashèntnan ku ta den un kondishon krítiko.

E departamento di ICU por resultá difisil pa algun pashènt i bishitante ku por keda intimidá pa e aktividatnan, sonido, mashin, tubu i monitòr. E por ta un eksperiensia inkómodo pa bishitá un ser kerí ku ta den ICU; bo por sintibo impotente, frustrá i tristu. Staf di ICU ta komprondé bo sentimentunan i prekupashon. Nos ICU tin hopi mas tantu médiko i enfermera presente, kompará ku e kantidat di pashènt; esei ta pa segurá ku tur pashènt ta keda monitoriá di aserka.

Tratamentu i Kondishonnan

  • Aparatura na Departamento di ICU
  • Por ta un tempu spantoso i insigur pa abo, famia i amigunan ora boso bishitá sernan kerí den ICU ku ta keda monitoriá i sostené pa un òf mas mashin. Den ICU bo lo mira hopi pashènt ku ta konektá na un monitòr di kurason, otronan lo ta konektá na un aparato di respirashon òf na mashin di diálisis i na infus. Ser prepará pa mira hopi tubu i aparato di monitòr. Kasi tur aparatura di ICU ta hasi uso di alarma pa laga e staf médiko sa di un kambio den e kondishon di e pashènt. No ta tur alarma ta nifiká un situashon di emergensia.
  • Telefòn selular
  • Bo telefòn selular mester ta pagá den ICU. Nan por interferí ku aparatura eléktroniko vital pa e pashènt.
  • Bishitante
  • Nos tin un maneho estríkto di bishita pa sigurá bienestar di nos pashèntnan. Nos tim di ICU lo komuniká e maneho, eksigenshanan i oranan di bishita direktamente ku e promé persona di kontakto di e pashènt. Por fabor nota ku bishita ta keda limitá na persona ku e pashènt ta konsiderá komo famia imediato. Si bo ta sintibo malu òf bo ta sufri di un kondishon di salú, por fabor rekonsiderá bo bishita na ICU òf papia ku e staf di ICU tokante bo situashon promé ku bo plania un bishita.
  • Higiena
  • Pashèntnan di departamento di Intensive Care ta hopi vulerabel pa infekshon. Pa e motibu ei ta importante pa bishitantenan laba nan man promé ku drenta ICU pa asina prevení transmishon di infekshon.
  • Regalo
  • Tin restrikshon pa pèrmití akseso na aparatura médiko vital i pashèntnan. Si bo no sa kiko bo por trese, pidi staf di ICU promé ku bo plania bo bishita.

Programa i Servisionan di Intensive Care

  • Guia
  • Atmishon na ICU pa motibu di un malesa krítiko òf un aksidente por tin un impakto enorme riba bo bida i bo famia, tantu físikamente komo emoshonalmente. Nos ICU na Curaçao Medical Center tin un guia dediká na brinda sosten i guia na pashèntnan i nan famia. E guianan tin hopi eksperiensa i konosementu amplio di proseduranan di ICU.
  • Kuido di pastoral i spiritual
  • Hopi persona ta eksperiensiá pensamentunan emoshonal i spiritual ora nan tin un ser kerí den kondishon krítiko na hòspital. Nos ta brinda guia pastoral pa pashèntnan i famia ku mester di guia i sosten spiritual professional i kompashon. Tambe nos ta ofresé un espasio di trankilidat na level 1 ku ta habri 24×7 pa momentunan di reflekshon i orashon.