Introdukshon
Bo a bai poli ku bo siruhano ortopédiko i komo resultado di bo kehonan i e apnormalidat presentá riba e radiografia, huntu boso a disidí pa laga buta un hep artifisial pa redusí bo kehonan. Un operashon asina no ta algu chikitu i e rehabilitashon ta rekerí hopi forsa di boluntat i esfuerso di abo i hendenan den bo serkania, manera por ehèmpel miembronan di famia i amigunan. Un bon preparashon i bon informashon lo kontribuí na un rekuperashon mas lihé. E proseso di rehabilitashon ta destiná pa duna bu mas tantu sosten posibel. Ta importante pa bo ta kompañá pa un persona ku por bishitá bo regularmente, pa e persona aki ta bon na altura di e ruta ku mester sigui.
Bo siruhano ortopédiko a splika bo algun kos kaba na poli. Den e foyeto di informashon aki bo por lesa tur kos tokante bo operashon i e proseso di rehabilitashon. Tambe e ta kontené un video ku ta demostrá ampliamente loke bo operashon ta enserá.
E hep gastá
E artikulashon di e hep ta un ‘artikulashon di bala’. Ora di kana di move e kabes den forma di un bala suavemente ta kai den e kavidat di e bekken. Esaki ta posibel pasombra tin un base di kartílago riba e kabes i den e kavidat. Kartílago ta un tehido suave i resistente. Ku edat e base di kartílago ta bira mas fini i por asta disparsé. Esaki ta keda deskribí komo gastá òf osteoartrítis. E artikulashon gastá por provoká doló i restrikshon di movementu. Si e kehonan oumentá, esaki por ta un motibu pa kambia pa un hep artifisial. Den e kaso aki tantu e kabes i e kavidat ta keda remplas’é. Esaki tambe ta konosí komo un prótesis total di hep (THP).
Motibunan pa gastamentu
Tin vários motibu pa osteoartrítis:
- E base di kartílago ta gasta pa motibunan deskonosí. Esaki ta gasta e base di kartílago na e parti di e wesu. Eventualmente e wesu ta keda (parsialmente) eksponé. E tipo di osteoartritis aki ta komun pa hendenan mediano edat òf mayó.
- Un reakshon inflamatorio por afektá e kartílago, por ehèmpel den rheumatoid artritis. Esaki tambe ta gasta e base di kartílago na banda di e wesu, òf e base ta disparsé por kompleto. Esaki por okurí na kualke edat.
- Despues di un infekshon (septic artritis).
- Osteoartritis tambe por desaroyá despues di un otro kondishon, manera por ehèmpel un fraktura di wesu òf un defekto kongenital di hep. E kartílago por haña daño direkto òf por gasta mas lihé pa motibu di un otro manera di move. Osteoartritis ku ta okurí despues di un fraktura di wesu òf un aksidente yama osteoartritis post-troumátiko. Esaki por sosodé hopi aña despues di e aksidente.
Kehonan
E keho mas komun di un hep gastá ta doló. Usualmente bo ta eksperensiá doló den bo lis, chanchan òf e parti pafó di e bèl di pia. Tin bia esaki ta ekspandé te e bèl i rudia. E hep hopi bia ta mas steif i bo por tin difikultat a bisti mea òf sapatu por ehèmpel. Hopi hende ta eksperensiá doló ora nan mester lanta for di un
stul òf nan ta lanta mardugá paso nan ta sinti doló. Hopi bia hende ta eksperensiá ku e hep mester lòs parti mainta. Kana, bùk i subi trapi ta bira mas i mas difísil. E kehonan ta oumentá asina e gastamentu empeorá.
Eksaminashon
E diagnóstiko usualmente ta tuma lugá pa medio di radiografia.
Tratamentu
Den un fase trempan hopi bia por trata un hep gastá ku remedi (kontra doló/anti inflamatorio) i e konseho ta pa keda move hopi. Si ta nesesario un fisioterapista por yuda. Tambe bo por ahustá bo manera di biba, por ehèmpel dor di pèrdè peso. Si e hep ta duna bo asina tantu doló i e ta asina steif ku kanamentu ta difísil, por tuma e desishon pa un prótesis kompleto di hep.
Benefisionan di e operashon
E doló ku bo tabata eksperensiá promé ku bo operashon lo disminuí. Tin bia e artikulashon de hep ta keda un tiki sensitivo den e promé lunanan, pero despues di un aña 90% di pashèntnan ta satisfecho ku e resultado di e prosedura. E sensashon di steif di e hep tambe ta mehorá, pero paso e múskulonan rondó di e hep hopi bia ta akortá pa motibu di doló di hopi tempu, e hep hopi bia no ta bira mes flèksibel ku e tabata.
Detaye di registrashon
For di medio 2021 nos ta afiliá ku e Registro Nashonal Hulandes di Implantashon Ortopédiko (LROI). Ku ayudo di e registro aki, e kalidat di e prótesis i kuido ortopédiko por keda monitoriá, kompará i mehorá internashonalmente. E registrashon aki ta yuda klara por ehèmpel kuantu tempu diferente prótesis di hep i rudia ta funshoná bon. Tambe nos lo hasi uso di kuestionario pa nota bo eksperensia i rehabilitashon. E registro ta yuda e ortopedista pa skohe un bon remplaso pa bo hep òf rudia. Bo informashon ta keda registrá anónimo. Bishitá www.Iroi.nl pa mas informashon tokante e registro.
Promé ku operashon
Despues ku bo a disidí huntu ku bo ortopédiko ku bo ke un hep artifisial, bo lo haña un sita pa bishitá e anestesiologo pa un skrinen pre-operativo. Pa esaki bo mester duna sanger. E anestesiologo entre otro lo diskutí si bo mester di un epidural òf anestesia general durante e operashon. Aparte di un epidural bo por haña un kalmante pa bo eksperiensiá mas tiki doló ku ta posibel di e operashon. Si por ehèmpel bo ta keda tratá pa un kardiólogo òf spesialista di pulmon, den sierto kaso nan mester duna informashon. Ora bo a finalisá e skrinen, e departamento di planiamentu lo tuma kontakto ku bo asina ku e fecha riba kua bo ta keda operá ta konosí.
Atmishon/fecha di operashon/estadia
Departamento di atmishon lo tuma kontakto ku bo tokante fecha di bo operashon. Si bo tin un herida òf infekshon djis promé ku bo atmishon, bo mester mèldu esaki mesora. Pa e informashon general tokante atmishon i estadia den CMC, nos ta referí bo na e informashon general. Usualmente, pashèntnan ku ta bin hòspital pa un remplaso di hep total ta keda den hòspital entre 2 i 5 dia. En prinsipio bo por bai kasi ora e herida a seka i e ehersisionan ku e fisioterapista ta bai bon.
E operashon
Durante e operashon ta kòrta den e kueru pa despues habri e hep. Ta kita e kabes femoral bieu (wak potrèt 2 i 3 i video). E kavidat di hep ta keda prepará ku un fresa pa despues buta un resipiente nobo di plèstik òf metal. Despues di esaki ta buta un pida metal den e parti ariba di e pia riba kua ta apliká e kabes di metal. E kabes i kavidat nobo ta forma e artikulashon di hep nobo. Despues di a buta e prótesis, ta sera e herida ku suturas i/òf nit di metal. Despues di alrededor di dos siman, ta kita e puntanan. Esaki ta sosodé na e ofisina di e ortopédiko na poli. E operashon normalmente ta dura 45-90 minüt. Despues di e operashon bo ta risibí antibiótika di korto uso pa medio di un infüs pa asina minimalisá e riesgo di infekshon.
Na Kòrsou nos ta hasi uso únikamente di prótesis ku a demostrá di tin bon resultado a largo plano den estudionan internashonal. E ortopédiko por skohe un prótesis ku a keda traha ku òf sin semènt. Ámbos opshon ta demostrá bon resultado a largo plano.
Despues di e operashon
Despues di e operashon bo ta bai e kamber di rekuperashon. Akinan tambe bo ta keda konektá riba aparatonan di monitoreo, pa asina nos por monitoreá bo funshonnan vital. Ora bo ta bei i tur bo funshonnan vital ta na òrdu, nos ta hiba bu sala di enfermeria. Einan e enfermero na warda lo informá bo persona di kontakto i e por bin bishitá bo den konsulta ku e sala di enfermeria. Despues di e operashon bo lo tin un infüs den bo brasa. Pa medio di e infüs aki bo to haña antibiótika i vògt adishonal. Bo tin un riesgo pa desaroyá trombósis (pròp di sanger den ardu) den e periodo despues di e operashon, parsialmente pa motibu di ménos mobilidat. Pa prevení esaki bo ta risibí remedi antikoagulante pa un periodo di sinku siman despues di e operashon di bo siruhano ortopédiko.
Despues di tratamentu
Despues di e operashon bo ta kuminsá ku bo rehabilitashon mas lihé ku ta posibel i tambe ta saka un potrèt post-operashonal. E fisioterapista ta guiá bo ku ehersisionan riba kama, e ta yudá bo Sali for di kama mas lihé ku ta posibel i e ta siña bo kon pa kana atrobe. Den prinsipio bo ta hasi uso di un andador i despues posiblemente krùk. E fisioterapista tambe ta siña bo e mihó manera pa para, pa drumi riba kama, sinta i drumi. Bo ta bandoná hòspital na pia ku yudansa (andador òf krùk) i bo ta haña sierto regla pa biba nobo. Tin bia bo ta risibí un referensia pa un fisioterapista tambe. E kantidat di dia ku bo ta keda den hòspital ta dependé di kon bo rehabilitashon ta bai. Alrededor di dos siman despues di bo operashon, bo ta regresá serka bo ortopédiko pa un chekeo i pa kita e puntanan. Hopi bia bo hep ta poko sensitivo durante e promé lunanan despues di e operashon. Esaki ta kambia den e manera ku bo ta kana. Bo múskulonan mester di tempu pa adaptá na e situashon nobo.
Si e herida ta mustra señal di infekshon despues ku bo a regresá kas, manera por ehèmpel mas kòrá òf kayente, ku e ta lèk vògt, mas doló òf keintura, por fabor tuma kontakto ku bo ortopédiko mesora.
Komplikashon
Danki Dios ku komplikashonnan di un prótesis total di hep ta masha poko. Aki ta sigui algun di e komplikashonnan mas komun.
- Infekshon di herida i infekshon di prótesis di hep, alrededor di e periodo di rekuperashon òf años despues.
- Luxasion. Esaki ta nifiká ku e kabes di e hep artifisial ta sali for di e kavidat. Esaki ta mas probabel den e promé tres lunanan despues di e operashon. Pa e motibu ei bo mester mantené bo mes na e instrukshonnan di movementu i presta bon atenshon durante e periodo di rehabilitashon. Si bo hep ta sali for di lugá, bo ta wòrdu hisá i ta hinka e kabes di e hep artifisial bèk den su kavidat. Esaki ta tuma lugá bou di anestesia.
- Por tin un fraktura di e kavidat òf bèl durante e operashon. Esaki usualmente por keda solushoná fásilmente durante sirugia.
- Kalsifikashonnan rondó di e artikulashon di hep.
- Sangramentu.
- Diferensia den largura di pia (den e kaso aki kisas bo mester bisti un hilchi den e sapatu). Un diferensia den largura di pia den sierto kaso no por wòrdu evitá pa asina sigurá ku e prótesis di hep ta stabil. Dor di hasi un pia un tiki mas largu ku e otro, bo ta oumentá stabilidat i redusí chèns ku e hep ta sali for di lugá. E kurpa ta ahustá i kustumá ku e diferensia chikitu despues di 3 -4 luna despues di e operashon.
- Trombósis i ebolismo di pulmon (pròp di sanger den ardu di pia ku ta bai e pulmonnan). Pa minimalisá e riesgo aki, bo ta haña antikoagulante (remedi pa hasi e sanger mas fini) den forma di prek òf tablèt durante sinku siman.
- E prótesis ta bira lòs despues di un periodo mas largu. Den e kaso aki por remplasá e prótesis di hep si esaki ta nesesario.
- Daño na e nèrvionan (parálisis di parti di e pia) por tuma lugá.
Preguntanan frekuentemente hasi tokante remplaso total di hep
- Kuantu tempu mi ta keda ku doló na mi hep?
- Kuantu tempu mi pia ta keda hinchá?
- Kuantu tempu mi mester keda tuma remedi pa hasi sanger delegá?
- Kon mi ta trata mi herida?
- Ki dia mi por baña atrobe?
- Ki dia mi por drumi riba mi zei atrobe?
- Ki dia mi por traha den kurá atrobe?
- Ki dia mi por bai trabou bèk?
- Ki tipo di sapatu mi mester bisti?
- Mi mester bisti mea pa komprenshon?
- Kiko mi mester presta atenshon na dje despues di e operashon di hep?
E doló despues di un operashon di hep gradualmente ta bira ménos. Tres pa kuater luna despues di e operashon, mayoria pashènt no tin keho mas. Mehorashon ta sigui te un aña despues di a buta e prótesis. Tin bia e pashènt ta sinti un doló leve despues di un kaminata largu; e sentimentu aki por tuma lugá te mas o ménos 12 luna. Doló despues di lanta i tuma e promé pasonan por keda pa un ratu. E sensashon doloroso aki ta mehorá sin tratamentu. Esaki no ta nifiká ku e prótesis no ta funshoná manera debe ser òf ku e ta lòs!
E hinchá ta redusí durante e promé simannan despues ku e pashènt a regresá kas. E oumento di peso lo keda redusí dor di hisa e pianan regularmente durante dia. E hinchá generalmente ta pió parti anochi i ta bira ménos si bo ta sigui hasi bo ehersisionan bon.
Despues di e operashon bo mester tuma un inyekshon òf tablèt pa dia kontra trombósis. Bo mester sigui hasi esaki pa por lo ménos sinku siman despues di e operashon (si ta nesesario, esaki lo keda disidí pa e médiko general òf e spesialista). Si promé ku e operashon ya bo ta tuma remedi pa hasi sanger delegá, bo dòkter lo konsehá bo tokante uso.
E herida mester keda limpi i seku. E kueru rondó di e herida por mustra kòrá òf iritá. Ora kita e puntanan (despues di mas o ménos dos siman) e kòrá gradualmente lo bira ménos. Si e área rondó di e herida hincha, bira kòrá òf ta saka vògt, ta bon pa bo tuma kontakto ku bo siruhano ortopédiko.
Bo por baña ora e herida ta bon tapá ku un pleister di plèstik. Tres dia despues ku bo a laga kita e puntanan, bo por baña sin e plèstik. No sinta den awa òf laman pa un ora i no laga e herida bira moli. Ta mihó pa laba e herida ku bo mannan i no ku un paña pa e promé dos lunanan. Bo mester ta poko poko ku uso di krema òf lotion riba i rondó di e herida.
Konsultá bo siruhano ortopédiko, durante e evaluashon na poli despues di 6 luna, si bo por drumi riba bo zei atrobe i riba kua zei.
Si bo ke traha den kurá bo por palabrá esaki ku bo dòkter durante bo promé bishita na poli. E konseho di e fisioterapista ta pa sinta i hasi uso di un skòp ku man largu.
Mayoria hende ta bai traha despues di mas o ménos 2 pa 6 luna, dependé e tipo di trabou i e progreso di rekuperashon i tambe e konseho di e siruhano ortopédiko i/òf fisioterapista. Trabou ku ta físikamente leve posiblemente por wòrdu hasí mas lihé.
Ta konsehabel pa bisti sapatu ku ta pèrtá na pia i ku tin un hilchi hanchu. Evitá di bisti hilchi haltu i flip flòp durante e promé tres lunanan.
No ta nesesario pa bisti mea pa komprenshon, pero e ta yuda redusí e hinchamentu den e pia. Si bo pia ta hincha durante dia, ta bon pa bisti e mea.
Durante e promé tres lunanan despues di e operashon, ta hopi importante pa bo opservá e siguiente reglanan di bida pa prevení luksasion (pa e hep sali for di lugá).
1. No hiba bo rudia pa bo nanishi (por ehèmpel pa kòrta bo uñanan).
2. No bùk dilanti di un stul.
3. No sinta ku bo pianan krusá.
4. No bùk.
5. No sinta riba un stul abou.
6. No bùk ku bo pianan pegá banda di otro. Bo fisioterapista lo siña bo kon pa hisa algu for di flur ku e pia ku ta operá mandá patras.
7. No bisti mea i sapatu na e manera normal (na e pia operá).
8. Evitá moveshonnan ekstremo.
9. Durante e tempu aki, e pianan mester keda un poko separá ora bo sinta i ora bo drumi.
10. Bo por para bo so, pero no kana i/òf bira.
• Para por ehèmpel na un mesa ta posibel i pèrmití.
11. Gimnasio i deporte (limitá) ta posibel i pèrmití despues di mas o ménos tres siman (konsultá bo dòkter!).
Total di hep movie showcase (Ku permit di e Asosiashon Hulandes di Ortopédiko)
