Kòmplimènt i Keho

Bo feedback ta importante pa nos tim. Konstantemente nos ta buska oportunidat pa mehorá e kalidat di kuido i servisio. Kehonan ta yuda nos rafiná i drecha e manera ku nos ta hasi nos trabou na Curaçao Medical Center. Meskos, un kòmplimènt ta motivá nos tim i yuda nos rekonosé ora nos ta kumpli ku òf superá standard di kuido.

Prosedimentu di keho

Si bo ta satisfecho ku e kuido risibí, bisa otronan, si no ta asina, bisa nos!

Curacao Medical Center ta haña importante ku e pashèntnan ta satisfefcho ku e kuido risibí. A pesar di tur e esfuersonan, por surgi sentimentunan di insatisfakshon i mal komprendimentu pa ku e atenshon i kuido risibí. Nos ta rekomendá bo pa entregá un keho mas pronto ku ta posibel pa asina nos por prosesá esaki.

Unda mi por bai ku mi keho?

Un keho por ser deskutí mihó kaminda e ta originá. Bo por drenta den kontakto ku e hefe di e departamento konserní. Tambe bo por entregá bo keho na e funshonario di keho. Huntu por determiná kon pa manehá e keho. Por ehèmpel dor di intervenshon.

Maneho di keho

Tur e kehonan ta ser registrá i raportá na e Hunta di Direktiva. Un keho por ser manehá den e siguiente formanan:
– Petishon pa solamente registrá e keho: esun ku ta entregá e keho no ke e opinion/investigashon di e komishon di keho, pero e ke duna un señal òf informá e defekto òf insatisfakshon. E keho aki ta ser registrá i analisá.
– Petishon pa un mediashon/intervenshon (solushon práktiko): e funshonario di keho ta risibí e keho i ta buska un solushon;
– Petishon pa un investigashon: e Komishon di Keho ta investigá e keho i ta husga e kaso (ta duna su opinion). E Komishon di Keho ta atendé solamente kehonan por eskrito (ku ta butá pretu riba blanku).

Tambe ta posibel un kombinashon di diferente formanan.

Si esun ku ta entregá e keho ke un intervenshon di e funshonario di keho i/òf ke un investigashon di e Komishon di keho, e lo tin ku yena i firma un formulario di autorisashon (pèrmit pa wak den e dossier médiko) (si esaki ta necesario pa ku e maneho di e keho). Pa medio di e pèrmit aki, esun ku ta entregá e keho ta autorisá e médikonan, enfermeronan i paramédikonan involukrá den e kaso pa duna informashon i investigá e dossier médiko dor di e funshonario di keho i e Komishon di keho, según esaki ta nesesario pa ku e maneho di e keho.

E Komishon di Keho

E Komishon di Keho ta independiente i imparsial i tin e tarea pa duna su opinion ofer di e balides di e keho basá riba e investigashon ku a ser inisiá. Durante di un reunion, e Komishon di Keho ta duna esun ku a entregá e keho e oportunidat pa e por splika su keho verbalmente. Durante di e reunion aki e akusado tin e oportunidat pa reakshoná verbalmente. Normalmente tur dos partido ta ser skuchá simultáneo. Tur dos partido tambe por ser asesorá dor di un persona ku nan mes a skohe pa asina trata e keho. Despues, e desishon di e Komishon di Keho ta ser mandá na esun ku a entregá e keho, e akusado, e hefe konserní i e Hunta di direktiva.

Importante

Indiká bon kla e kausa di bo keho i kiko bo ke logra. Un keho bon formulá ta evitá malkomprendementu i desepshonnan. Inkluí tur e detayenan manera ta indiká riba bo karchi di pashènt.

Si bo ta entregá un keho di un pashènt, tambe indiká su nòmber, adrès, number di telefòn i si ta posibel tambe su e-mail.

Keho