Prestashon di kuido

Prestashon di kuido Mei 2025

Prestashon di kuido Desèmber 2024

Den luna di desèmber CMC a sigui duna kuido médiko di kalidat haltu. E kantidat di bishita na departamentu di emergensia a oumnetá di 1.777 na novèmber pa 1.932 na desèmber. Sinembargo, imágen i diagnostiko manera CT scan, MRI i radiologia a wòrdu usá ménos den desèmber, kual ta komun durante dianan di fiesta.

E kantidat di bishita pa promé bia na poliklínika a baha di 4.956 pa 4.442, i di dos sita di 9.029 pa 8.022. Atmishonnan na hospital tabata un poko mas abou, i e promedio di estadia den hospital a bai di 2.6 dia pa 2.4 dia. E porsentahe di pashèntnan atmití ku a fayesé tabata 2.27% (27 kaso) na desèmber, kompará ku 2.24% (26 kaso) na novèmber.

E kantidat total di operashonnan tabata un poko mas abou, pero e kantidat di nasementu a oumentá di 89 pa 100, inkluyendo 32 sesárea. Kateterisashonnan kardiako tambe a subi di 57 pa 68 prosedura.

Satisfakshon di pashènt a keda haltu, ku un promedio di 8.5. E áreanan ku pashèntnan a evaluá mihó tabata konosementu di personal (96.1%) i seguridat di pashènt (91.9%). E kalifikashonnan mas abou tabata pa informashon tokante tempu di espera (60.9%) i splikashonnan di efektonan sekundario di remedi (50.0%).

CMC ta trahando riba mehorá programashon di sita, planifikashon di sirugia i komunikashon kla tokante tempu di espera i tratamentunan. E esfuersonan aki ta mustra e kompromiso di CMC pa mihó kuido di pashènt

Prestashon di kuido Novèmber 2024

Prestashon di kuido Òktober 2024

Prestashon di kuido Sèptèmber 2024

Prestashon di kuido August 2024

Prestashon di kuido Yüli 2024

Akinan un korto deskripshon di puntonan ku ta resaltá den nos prestashon di kuido.

Akinan un korto deskripshon di puntonan ku ta resaltá den nos prestashon di kuido.

Departamentu di Emergensia
Den luna di yüni 2024, Emergensia a trata 1.706 pashènt. A tuma nota ku mas ku mitar (54%) di e pashèntnan aki a bin Emergensia sin konsultá nan dòkter di kas, i ku 60% a bai kas bèk despues di nan bishita na Emergensia. Esaki ta indiká un grado haltu di konfiansa den e servisionan di CMC. CMC ta urgi komunidat pa hasi uso di Huisartsenpost (HAP) pa kasonan di urgensia ku no ta un peliger di bida, pa asina departamentu di Emergensia por konsentrá riba kasonan mas kritiko. HAP ta kompletamente ekipá pa duna Kuido médiko di urgensia i a wòrdu establesé pa por aliviá preshon for di Emergensia.

Potrèt Médiko
E departamentu di radiologia a realisá un kantidat konsiderabel di eksámen diagnostiko e luna aki. Un total di 1.824. E kantidat di mamografia a baha un tiki kompará ku e luna anterior, i tabata un total di 180 .

Konsulta na Poli i Pashèntnan Interná
E polikliniknan a risibí 4.427 pashènt ku a bin pa nan promé sita i 8.065 pashènt ku a bin pa kòntròl. E kantidat di pashènt ku a keda interná tabata 1.775 i a keda un promedio di 2.5 dia hospitalisá. A realisá 526 operashon, inkluso sesaria. Un total di 87 beibi a nase, di kua 19 tabata pa medio di sesaria.

Satisfakshon di Pashènt
Satisfakshon di pashènt ta keda un área di enfoke importante pa CMC. Den luna di yüni, pashèntnan a duná poliklinikanan i departamentu di enfermeria un skor promedio di 8.5.  E áreanan ku a risibí puntuashonnan haltu ta konfiansa den dòkter i enfermero, i komunikashon konsistente entre e disiplinanan.

Na e otro banda, tempu di espera i envolvimentu di famianan den e proseso di òntslag a risibí skor abou. CMC tin vários inisiativa pa trese un kambio den esakinan. Pa baha tempu di espera lo hasi mihó uso di e kapasidat di salanan di operashon i lo ta mas proaktivo ku informashon na pashènt. Pa envolví famia den kuido di nan ser kerí CMC a bin ta apliká e filosofia di “Family Centered Care.”

CMC ta sigui hasi tur esfuersonan pa mehorá kalidat di kuido i e eksperensia di pashènt.

Prestashon di kuido Mei 2024

Akinan un korto deskripshon di puntonan ku ta resaltá den nos prestashon di kuido.

Na mei 2024, departamentu di emergensia a trata 1,811 pashènt. E kantidat haltu di bishita di pashènt akí di kual mas ku mitar (56%) a opta di nan mes pa akudí na sala di emergensia, ta aksentuá e konfiansa di komunidat den servisionan di CMC. Ta importante pa tuma nota ku Huisartsenpost (HAP) a ser establesé pa aliviá e peso riba departamentu di emergensia, pues nos ta enkurashá komunidat pa hasi uso di HAP pa kasonan di urgensia ku no ta forma peliger pa bida di e pashènt. Di e forma akí departamentu di emergenisa por konsentrá riba e kasonan mas krítiko. Pues den futuro serkano ta spera un redukshon den e kantidat di pashèntnan ku ta opta di nan mes pa bai departamentu di emergensia.

Departamentu di radiologia a mustra aktividatnan signifikativo durante luna di mei, inkluyendo 847 CT skèn i 219 mamografia. Sirugianan ta keda un parti importante di servisio nan di CMC, pa luna di mei esakinan a suma un total di 567 operashon inkluyendo 22 sesárea. Mas aleu, e kantidat di pashènt ku a bishitá poliklínika pa un promé sita di konsulta a suma 4700 i averahe di estadia den hòspital a subi untiki kompará ku e luna anterior di 2.2 pa 2.3 dia.

Nos investigashon kontinúo den satisfakshon di pashènt ta di gran importansia pa servisionan di CMC. Un punto di mehorashon frekuentemente menshoná ta pa mantené informashon kontinúo tokante tempu di espera. Pa atendé esaki, CMC implementá varios inisiativa, inkluyendo utilisá kompletamente e kapasidat di salanan di operashon i klínika pa redusí e listanan di espera.
CMC su enfoke ta keda riba mehorá kalidat di kuido i kontinuamente mehorá e eksperensia di e pashènt i resultadonan di kuido na CMC.

Prestashon di kuido Aprel 2024

Akinan un kòrto deskripshon di puntonan ku ta resaltá den nos prestashon di kuido.

Na aprel 2024 e departamentu di emergensia a trata 1.672 pashènt. Un kantidat signifikante di e pashèntnan a opta di nan mes pa akudí na sala di emergensia. Esaki ta demostrá konfiansa den servisionan di CMC. E departamentu di radiologia tabata hopi aktivo den duna servisio esensial di imágen médiko. Den aprel e kantidatnan notabel ta inkluí 226 mamografia, 2.014 rayo-X i 128 skèn di MRI. Nos por nota un bahada den kantidat di MRI den luna di aprel, esaki ta relatá na algun difikultat tékniko ku e makinaria. Afortunadamente esaki a ser resolvé i nos por sigui brinda e servisio nesesario na nos pashèntnan.

E kantidat di sirugianan tambe ta sigui haltu, ku 542 sirugia kompletá na aprel inkluyendo sesárea. Esaki komo parti di nos esfuerso den baha e lista di espera pa pashènt.

Nos enfoke ta riba redusí lista di espera. Den esaki, poliklínikanan su ophetivo ta pa redusí tempu di espera pa un promé sita na poliklinika te máksimo 4 siman. No opstante e retonan manera por ehèmpel subida den kantidat di pashènt i redukshon den kantidat di spesialista, CMC ta kontinuá ku optimalisashon di prosesonan pa manehá e demanda di kuido.

Satisfakshon di pashènt ta sigui ta un prioridat. E averahe di evaluashon pa poliklínika ta 8.4 kual ta demostrá un fundeshi fuerte di konfiansa i profeshonalismo den CMC. Mas aleu, CMC ta komprometé na traha, haña i implementá solushonnan permanente pa mehorá e áreanan nesesario.

Mientras nos ta kontinuá den nos afan pa ekselensia den kuido médiko, nos ta keda komprometí na mehorá e áreanan nesesario i e eksperensia di pashènt en general

Prestashon di kuido Mart 2024

Akinan un kòrto deskripshon di puntonan ku ta resaltá den nos prestashon di kuido.

Na mart 2024 e departamentu di emergensia a trata 1.839 pashènt, mas ku mitar di e pashèntnan a opta di nan mes pa akudí na sala di emergensia. Esaki ta demostrá konfiansa den servisionan di CMC. Na mes momentu solamente 18% a ser referí pa dòkter di kas.

Ta di remarká, ku tin un redukshon den e índise di mortalidat kual a baha di 2.44% na febrüari pa 1.36% na mart, reflehando nos kompromiso pa ku siguridat di pashènt i kalidat di kuido.

E índise di mortalidat pa e promé kuartal di aña a ser establesí na 2.38%, kual ta averahe di un índise di mortalidat kompará ku seis hòspital similar na Hulanda. Tres di mesun tamaño (na kantidat di kama) i 3 di e mesun tipo di kuido hospitalario.

Debí ku uso efisiente di rekursonan ta garantisá diagnóstiko na tempu; departamentu di radiologia a eksperensiá un oumento den tèst di imagen den 2024, inkluyendo “CT scans” i “MRIs”.

Mientras nos ta enfoká kontinuamente riba redukshon di listanan di espera; na poliklínika, nos ta enfoká riba un máksimo di 4 siman di espera pa promé sita, mientras nos ta sigui traha inkansabelmente riba optimalisashon di prosesonan. Un kantidat kresiente di demanda di kuido den kontraste ku un kantidat disminuyente di spesialista debí na LNT ta un reto kontínuo pa CMC. Adishonalmente, sala di operashon a mira kresementu di operashonnan, esaki debí parsialmente na uso optimal di e salanan di operashon disponibel, ku tambe ta yuda den redukshon di e lista di espera aktual pa operashonnan.

Satisfakshon di pashènt ta keda haltu, ku promedio di 8.5 pa poliklínika i 8.6 pa klínika (hospitalisashon). Ta resaltá un puntuashonnan eksepsional pa konosementu di dòkter tokante e historial médiko di e pashènt (97.1%) i siguridat (93.5%), indikando un fundeshi sólido di konfiansa i profesionalismo den CMC. E rèspèt i konfiansa ku pashèntnan tin den e personal médiko ta keda fuerte, ku puntuashonnan di mas ku 90%.

Mientras nos ta kontinuá ku esfuersonan pa brinda ekselensia di kuido di salú, nos ta keda komprometí pa atendé áreanan di mehorashon. Mehorashon di komunikashon tokante tempunan di espera tantu pa sita komo proseso pa duna di alta i envolvimientu di famia den prosedimentunan di alta ta entre nos inisiativanan kontínuo.