WILLEMSTAD, 23 di desèmber 2024 – Desafortunadamente direktiva di CMC no por garantisá e servisionan di un gastroenterólogo pa kuido di emergensia entre 5 PM i 8 AM riba e siguiente fechanan:
- Djaluna 23 di desèmber 2024
- Djaweps 1 di yanüari 2025
- Djabièrnè 3 di yanüari 2025 pa djadumingu 5 di yanüari 2025
- Djárason 8 di yanüari 2025 te ku djaweps 9 di yanüari 2025
Esaki ta e resultado direkto di e impakto di LNT. Apesar di hopi intento di e direktiva pa atraé gastroenterólogonan di Sur Amérika, Sentro Amérika, Oropa i otro partinan di mundu, direktiva di CMC no a logra organisá un servisio di ‘standby’ pa gastroenterólogonan na warda pa e dianan indiká. Intentonan pa kolaborá ku un gastroenterólogo lokalmente establesé tampoko no a duna ningun éksito den yena e servisio di ‘standby’, tambe komo resultado di LNT, esaki ta nifiká ku pashèntnan ku ta yega na departamentu di emergensia ta kore riesgo pa motibu di e falta di un gastroenterólogo (gastroenterólogo = stoma, igra, tripa) presente.
E direktiva di CMC ke enfatisá ku e nesesidat pa gastroenterólogonan kubri e “shift” nan na e Departamentu di Emergensia ta nesesario i hustamente pa e motibu aki direktiva di CMC a hasi tur ku por pa a prevení e situashon aki pa mas ku 1 aña i mei. Tin vários situashon krítiko kaminda e envolvimentu di un gastroenterólogo ta esensial pa un pashènt ku presentá na e departamentu di emergensia manera: sangramentu di varises, ophetonan pegá den e esófago (garganta) i ingestion di supstansianan venenoso. E ehèmpelnan aki, ounke no ta úniko, ta demostrá ku gastroenterólogonan ta nesesario den situashonnan di emergensia. E ousensia di un gastroenterólogo por kondusí na resultadonan di tratamentu indeseabel i resultadonan adverso.
Debí na un skarsedat kontinuo di gastroenterólogo debí na LNT i e karga di trabou kresiente pa gastroenterólogonan ku ta traha na CMC, nos a yega na un punto kaminda e situashon aki ta kompletamente insostenibel. E direktiva ta pone e falta di gastroenterólogonan komo resultado di LNT i e posibel konsekuensianan i/òf responsabilidatnan i posibel kalamidatnan ku por sosodé riba e dianan indiká serka e Minister di Salubridat Públiko, Medio Ambiente i Naturalesa manera ya a wòrdu komuniká den e kartanan di 6 di novèmber i 11 di desèmber último. Inspektor di Salubridat Públiko, Sr. Keli, tambe ta na altura di esaki. Direktiva di CMC ta spera sinseramente ku lo duna klaridat riba término kòrtiku pa loke ta trata e oumento di 130% den e remunerashon máksimo di LNT pa asina e direktiva no wòrdu strobá den retené i rekrutá spesialistanan médiko pa CMC. Mientrastantu, CMC ta sigui traha duru pa garantisá kuido di kalidat haltu ku e rekursonan aktual.
