Neurologia ta un disiplina amplio ku ta atendé tur kondishon ku ta afektá e serebro, e tutu di wesu, nèrvionan i tur otro parti di e sístema nèrvioso. Tin hopi defekto i malesa ku por impaktá e partinan aki di e kurpa i e efekto por ta amplio. Pa e motibu ei mayoria bia e kaso ta rekerí un tim hopi spesialisá pa diagnostiká i trata e defekto i/òf malesanan aki. Curaçao Medical Center ta ofresé kuido kompleto pa problemanan neurológiko i ta brinda tratamentu ekstenso pa mucha i adulto ku ta sufri di malesa neurológiko.
Na CMC nos tin un tim di médikonan ku ta spesialisá den tratamentu di kondishonnan neurológiko, i tambe un staf ku ta konsistí di enfermeranan sertifiká, téknikonan i otro personal médiko. Nos neurólogonan, neurosirugano i radiólogonan intervenshonal tambe semper ta na stand-by pa brinda kuido rápido pa pashèntnan ku ta eksperiensiá kondishonnan di emergensia manera por ehèmpel un atake serebral.
Tratamentu i Kondishonnan
- Doló di Lomba i Nèk
- Leshon na Serebro i tutu di wesu
- Tumor na Serebro i tutu di wesu
- Defekto di Soño
- Epilèpsi i atake
- Multiple Sclerosis
- Infekshonnan Neurológiko
- Malesanan Neurmuskular
- Defektonan di Movementu
- Parkinson’s i Defektonan di Movementu
- Atake Serebral i malesanan serebro vakular
- Defektonan Sikiátriko
Programa i Servisionan di Neurologia
- Kuido Médiko i Kirúrgiko
- Kuido kirúrgiko i no-kirúrgiko di wesu di lomba
- Tratamentu Neurovaskular
- Evaluashon i Tratamentu pa Epilèpsi i otro defektonan di atake
- Kuido Neuro Onkológiko
- Kuido di Infekshon
- Kuido Sikiátriko
Spesialista Neurologia
Dr. Cariana Prada - Neurológo
Cariana Prada M.D. a graduá for di Universidat di Carabobo (na Venezuela), kaminda e la studia Medisina Interno. Despues e la spesialisá riba tereno di neurologia adulto na Ciudad Hospitalaria Dr. Enrique Tejera (Valencia Venezuela), kaminda e la risibí treinen riba tereno di diagnóstiko, tratamentu i maneho di malesanan di e selebre i sistema nèrvioso. Durante su añanan di praktiká medisina e la risibí su diploma Masters di imunologia neurológiko i medisina pa drumi. Su tereno di interes ta Multiple Sclerosis i otro malesanan demielinisante di e sistema nèrvioso. E gusta traha den tim i e integrashon di neurologia ku otro spesialidat. E ta papia Spañó, Papiamentu i Ingles ku fluidez.
Dr. Ellianne Dos Santos Rubio -Siruhano Neurológo
Dr. Ellianne J. Dos Santos Rubio a atkerí su diploma di Neurosirugia na Erasmus Medical Center na Rotterdam na Hulanda. Pa su spesialisashon di mikroneurosirugia e la bai Unifesp/ICNE na São Paulo, Brasil kaminda e la haña guia di prof. F. Chaddad i prof. E. De Oliveira. Tambe e la hasi un spesialisashon di e kolumna vertebral na UNCH, Leiden kaminda e la wòrdu guiá pa prof. W. Peul. Dr. Dos Santos Rubios a kuminsá traha na Sint Elisabeth Hospitaal na 2017 i a transishoná pa CMC na 2019. E ta papia Papiamentu, Hulandes, Ingles, Portugues i Spañó.
E. Dos Santos Rubio, M.D., ta un neurosiruhanov general ku ta spesialisá den tratamentu di tumor di selebre, trauma di selebre i e kolumna vertebral, malesanan kompleho di e kolumna vertebral,malesanan di derivashon (pediatra) i deskompreshon di nèrvio perifériko. E la establesé un kolaborashon ku dos sentro akadémiko di neurosiruhano na Hulanda (Erasmus Medical Center i Universitair Neurochirurgisch Centrum Holland) i asina sòru pa kuido neurokirúrgiko kompleho na Latino Amérika i Karibe. Su enfoke prinsipal ta pa brinda un kalidat ekselente di atenshon i kuido neurokirúrgiko na su pashèntnan. E ta establesé un liña kontinuo di investigashon neurokirúrgiko huntu ku sentronan internashonal prominente, kaminda ta duna kuido neurokirúrgiko den Karibe un ròl mas prominente. E ta kofundador di Umente (un fundashon non-profit) ku ta empoderá abitantenan ku konosementu neurológiko i neurokirúrgiko i ta enfoká riba e prevenshon di malesanan. E ta miembro di vários sosiedatnan profeshonal, manera por ehèmpel e North American Spine Society, Eurospine, European Association of Neurosurgery, Dutch society of Neurosurgery (NVVN) i aktualmente ainda e ta miembro di staf médiko di Erasmus Medical Center.
Dr. Stephanus Bakker - Neurológo
Dr. Stephanus Bakker a kaba su estudio medisinal na 1989 na Universidat di Amsterdam. Di 1990 pa 1992 e la traha komo un médiko den entrenamentu na St. Elisabeth Hospitaal (SEHOS) na Kòrsou i di 1992 pa 1994 e la traha na Erasmus MC, ku ta un sentro médiko universitario na Rotterdam. E la kompletá su spesialismo den neurologia na 2000 i a traha riba e tereno aki na Erasmus, Amphia Ziekenhuis Breda – Oosterhout i na Franciscus Gasthuis & Vlietland. Na Franciscus Gasthuis & Vlietland e la fungi komo hefe médiko di 2007 te ora e la muda pa Kòrsou. E la haña su PhD na 2001 na universidat di Erasmus na Rotterdam i ta un miembro di e komishon di neurólogonan na Hulanda for di 2012. E fokùs di Dr. Bakker ta pa malesanan i doló di kabes neurovaskular. Riba tur dos tereno tatin progreso signifikante pa loke ta trata tratamentu den e último añanan. Dr. Bakker ta spera di por kompartí su ekspertisio na un manera humilde ku Curaçao Medical Center.
Dr. Jorien van Hoey Smith van de Wetering - Neurológo
Dr. Jorien “Nikkie” van Hoey Smith-van de Wetering ta un neurólogo ku un dedikashon enorme pa kuido sentrá riba pashènt. For di ougùstùs 2024, e ta afiliá na Curaçao Medical Center (CMC), kaminda e ta sigui praktiká na un manera holístiko pa kuido neurológiko.
El a kompletá su estudio di spesialista médiko den neurologia na Leiden University Medical Center (LUMC) na Hulanda di 2006 pa 2012.
Durante añanan, Dr. van Hoey Smith-van de Wetering a konstruí un karera amplio den neurologia. El a kuminsá komo un ANIOS (Arts assistent niet in opleiding) den neurologia na Leiden University Medical Center (LUMC), siguí pa su ròl komo neurologo na SEIN (Stichting Epilepsie Instellingen Nederland), un sentro di ekspertisio renombrá pa epilepsia i trastornonan di kana na soño. Despues el a praktiká na Ikazia Ziekenhuis na Rotterdam. Ademas di su trabou klíniko, e tin hopi aña di eksperensia realisando evaluashonnan di eksperto médiko den kuadro di prosedimentunan legal i kasonan di seguro.
Su interesnan klíniko ta inkluí e tratamentu di epilepsia i e uso di botulinum tòksiko (Botox) den manehá vários kondishon neurológiko. Dr. van Hoey Smith-van de Wetering ta konosí pa su enfoke holístiko na kuido di salú, rekonosiendo e impakto profundo di estilo di bida riba tantu malesa komo rekuperashon.
“Berdadero sanashon ta kuminsá ora nos trata e persona, no solamente e malesa. Tresiendo huntu, estilo di bida, mente i medisina den harmonia”