Willemstad 9 di mei, 2023 – Curaçao Medical Center (CMC) lamentablemente mester anunsiá kanselashon di diferente operashonnan debí na un skarsedat enorme di personal. E situashon desafortunado aki ta obligá hòspital pa limitá e operashonnan na solamente kuater sala di operashon operashonal, ku e resultado di restrikshon di sirugia esensial i agudo.
E faktor primario ku a kontribuí na e skarsedat di personal na CMC, ta debí na nuebe miembro di staf krusial ku ta ousente pa motibu di kebrante di salú pa un término largu òf ku a tuma retiro di trabou. E pèrdida inesperá aki di profeshonalnan kapasitá a trese un reto signifikante pa hòspital por mantené su kapasidat kompletu den salanan di operashon.
Pa por atendé ku e situashon di urgensia aki, CMC ta aktivamente tumando desishonnan pa reforsá e personal di sala di operashon. Hòspital ta hasiendo tur esfuerso pa reklutá personal di sala di operashon for di eksterior, ku e meta pa yena e skarsedat den e tim di operashon. E inisiativa pa reklutá internashonal ta pa trese personal eksperensiá ku por integrá fásil den e tim médiko eksistente i sigurá e kontinuidat di kalidat haltu di kuido.
Seguidamente , CMC ta rekonosé e importansia pa invertí den e komunidat di kuido lokal komo parti di e strategia pa un término largu. Hòspital ta komprometé pa desaroyonan i implementashon lokal di “training” nan i programanan ku IFE pa asistente di sala di operashon na Kòrsou. E programanan aki lo produsí aspirantenan individual ku e abilidat nesesario i e konosementu nesesario pa por traha efektivamente den salanan di operashon i alabes alsa e talento lokal i redusí e chèns pa dependé di rekursonan den eksterior.
Gerensia di Curaçao Medical Center ta pidi sinseramente diskulpa na tur pashènt ku ta wòrdu afektá debí na e kanselashonnan nesesario aki i ta sigurá tur pashènt ku tur esfuersonan aki ta wòrdu hasí pa minimalisá e impakto riba nan salú. Hòspital ta keda dediká pa duna prioridat na bienestar i seguridat di su pashèntnan, i ta tumando stapnan pa plania e operashonnan pa un otro fecha mas pronto posibel. E departamentu di planifikashon lo tuma kontakto direkto ku e pashèntnan aki.
CMC kier ekstendé su gratitut na komunidat di Kòrsou pa e komprenshon i apoyo durante e reto aki.
