Willemstad, 26 di vovèmber – Curaçao Medical Center (CMC) a hunga un ròl importante na International Medical Conference Curaçao (IMCC). Kardiólogo Pediátriko Dr. Shirley Lo-A-Njoe a presentá informashon esensial tokante malesa di kurason kongénito bou di mucha i e impakto kresiente di obesisat i kiko esaki ta nifiká pa nan kurason.
Den su presentashon, Dr. Lo-A-Njoe a enfatisá ku defektonan den kurason for di nasementu ta afektá alrededor di 3% di tur mucha, i un tersera parti di nan ta enbolbí e kurason. Malesa di kurason nasé ku ne ta keda un kousa importante di mortalidat den muchanan bou di 5 aña. Esaki ta enfatisá e nesesidat pa detekshon trempan, huntu ku sosten, guia i koordinashon pa/ku famia. E data sientífiko kresiente di Kòrsou aktualmente ta mustra un prevalensia di 2.5%, tresiendo dilanti aún mas e importansia pa monitor i hasi investigashon lokal.
Un parti signifikante di e presentashon a enfoká riba obesidat infantil, kual ta mas i mas visibel na Kòrsou i ta afektá muchanan ku a nase ku malesa di kurason den un manera desproporshonal. Hopi di e muchanan aki mester konsumí mas kaloria miéntras nan ta konfrontá restrikshonnan di aktividat, kreando un siklo ku ta oumentá nan riesgonan di kurason.
CMC a tuma un ròl proaktivo pa mehorá resultadonan pa e grupo aki. For di 2019, e hòspital ta referí muchanan ku malesa di kurason kongénito na un trayektoria di rekuperashon strukturá den kolaborashon ku e sentro di rehabilitashon dirigí pa Jacqueline Hol. Hol ta e fundadó di Rafana, un sentro di ehersisio médiko. E kolaborashon aki ta duna sosten na muchanan di 4 pa 17 aña. E ta kuminsá ku un evaluashon kompletu dor di e tim pediátriko di CMC , siguí ku un programa multidisiplinario spesialisá di Hol. Huntu, CMC i e sentro di rehabilitashon ta enfoká riba moveshon, kustumbernan saludabel i guia di estilo di bida a largo plaso. Sra. Hol a enfatisá ku e progreso mas impaktante ta tuma lugá ora famianan ta enbolbí aktivamente.
Alabes, CMC tambe ta ekstendé su kompromiso ku maneho di malesa via e programa Fit Kids, kual ta promové estilonan di bida saludabel pa muchanan sin kondishon kardiako. Dòkternan di mucha di CMC ta asistí pa medio di seshonnan di kana guiá, aktividatnan di landamentu i edukashon tokante salú.
Durante su remarkenan di apertura na e konferensia, Minister di Salubridat a enfatisá e impakto nashonal di e trabou di CMC. El a enfatisá e transformashon di hòspital den un sentro médiko modèrno ku mas ku 25 spesialisashon i su proseso pa realisá e akreditashon di Joint Commission International (JCI). El a elogiá tambe e dedikashon di CMC na kuido sentral riba famia komo un fundeshi di kuido médiko di futuro na Kòrsou.
Dr. Lo-A-Njoe a terminá ku un mensahe kla: kolaborashon den famia, den e kadena di kuido médiko di Kòrsou i entre partnernan regional ta esensial pa mehorá resultadonan pa muchanan ku malesa di kurason.
CMC ta keda komprometé na avansá kuido di kurason pa mucha, fortalesé e kamindanan di rehabilitashon i duna sosten na muchanan i famianan di Kòrsou ku kuido di kalidat haltu i ku kompashon.
