Willemstad, 20 di febrüari 2026 — Curaçao Medical Center (CMC) a bin ta traha riba un trayekto pa sigui mehorá na un manera strukturá i integrá. E enfoke ta riba kuido aksesibel, pa prosesonan ta efektivo i pa kuido ta sostenibel. Gerentenan den tur área di e organisashon a determiná i ta karga e direkshon aki huntu. E kolaborashon ta yuda garantisá pa asina liderazgo médiko, operashonal i atministrativo ta alineá.
Aworaki e prioridat ta pa fortifiká e base. Aunke ku tin ambishon pa e desaroyo di hòspital, e enfoke aktual ta riba stabilisá prosesonan i sigui traha responsabelmente ku rekursonan finansiero i rekursonan humano disponibel.
Na mes momento, ta importante pa rekonosé kiko ta funshoná bon. Apesar di e demanda kresiente, preshon di kapasidat i kompleksidat operashonal, kuido agudo i esensial ta sigui. Tur dia, profeshonalnan di CMC ta duna kuido médiko di kalidat haltu bou di sirkunstansianan ku ta rekerí fleksibilidat, resiliensia i kompromiso. E hòspital ta ekspresá su apresio i orguyo pa e dedikashon di su empleadonan, ku ta sigui funshoná na un nivel haltu den un ambiente di kuido di salú ku tin su retonan.
E inspekshon resién di sala di operashon ta wòrdu analisá aworaki i prosesá kuidadosamente. E resultadonan lo wòrdu tradusí den medidanan konkreto dirigí na mehorá planifikashon, i koordinashon di kapasidat. E pasonan aki ta esensial pa antisipá fluho di sirugia i pa atendé ku e tempu di espera di un manera sostenibel.
Mehorá kontakto entre hòspital i komunidat ta keda un enfoke. Prosesonan di planifikashon di sita, kordinashon interno i aksesibilidat via telefòn ta wòrdu revisá i fortalesé pa redusí e opstákulonan i mehorá e eksperensia di pashènt.
CMC ta sigui eksperensiá ku demanda di kuido ta subi, tantu den kantidat komo den kompleksidat. Esaki ta pone preshon struktural riba kapasidat i ta rekerí pa pone prioridat kla i ehekushon disipliná.
E sistema di kuido ta un kadena ku ta depende di kuido di hòspital, kuido serka dòkter di kas, kas di kuido, aseguradonan i outoridatnan di salú públiko. Pues un organisashon so, no por logra mehorá i keda sostenibel. P’esei CMC ta sigui enbolbí ‘stakeholdernan’ pa fortalesé strategianan di prevenshon i intervenshon trempan, partikularmente relashoná ku kondishonnan króniko manera diabétis.
E trayektoria aktual ta basá riba un aserkamentu den tur e áreanan di CMC. Aliniashon di liderazgo, prioridat realístiko i mehorashon struktural ta forma e fundeshi di e proseso aki.
CMC su prioridat ta keda klá: fortalesé e base, mehorá akseso na kuido, salbaguardiá kalidat i seguridat i sigui sostené e profeshonalnan ku ta hasi kuido di salú posibel tur dia.
