Willemstad, 16 di novèmber, 2023 – Curaçao Medical Center (CMC) ta anunsiá ku a hasi un kambio signifikante den su reglanan riba Unidat di Kuida Intensivo Neonatal (NICU), aliniá ku prinsipionan di kuido basá riba famia sentral (Family-Centered Care). E kambio ta drenta na vigor dia 17 di novèmber 2023, pa duna oportunidat pa mayornan di partisipá aktivamente den e trayekto di hòspital di nan beibi.
Rekonosiendo e ròl krusial ku mayornan ta hunga den bienestar i desaroyo di beibi den NICU, e departamentu a evaluá su reglanan pa krea un ambiente mas inklusivo i di sosten. Promé ku esaki, NICU tabata limitá e orario di bishita. Pero awor NICU lo duna mayornan e oportunidat pa ta presente for di 7:00 di mainta te ku 8:00 di anochi. Esaki ta duna un akseso prolongá i fleksibel pa sostené famianan durante e estadia di nan beibi den hòspital.
E kambio aki ta un paso grandi pa yuda mehorá e kalidat di kuido ofresé na CMC, enfatisando e importansia di envolvimentu di famia den e proseso pa e beibi kura. E desishon pa prolongá orarionan di partisipashon di mayor ta reflehá e kompromiso di CMC ku kuido basá riba famia sentral i ta rekonosé e ròl úniko i integral ku e mayor ta hunga den kuido i komodidat di nan beibi.
Dr. Naijla Duque, Dòkter di mucha, Neonatólogo i Hefe di spesialismo di mucha na CMC, a mustra entusiasmo pa e kambio progresivo aki, bisando, “NICU ta un espasio krítiko unda e kontakto entre mayor i su beibi ta esensial. Dor di prolongá orarionan di partisipashon pa mayornan, nos ta yuda brinda famianan ku e fleksibilidat i sosten nesesario durante un periodo difísil.”
E kompromiso di NICU pa un kuido ku kompashon i inklusividat ta reflehá den e kambio di regla aki, ku ta reforsá e dedikashon di CMC pa bienestar di tantu beibinan komo nan famianan.
