Willemstad, 30 di yüli, 2021 – Durante e último luna siruganonan di Curaçao Medical Center (CMC), Dr. Boyé i Dr. Berry, a realisá “resection” di igra ku pashènt ku kanser. Ta promé biaha ku e tratamentunan aki a tuma lugá na CMC. E prosedura aki ta enserá kòrta i saka un parti di un igra for di un pashènt. E proseso aki ta un bon opshon pa kura sierto kanser na igra i ta brinda un mihó perspektiva di bida na e pashènt.
Un igra ta un órgano vital kual ta nifiká ku un persona no por biba sin dje. E tin hopi funshon krítiko ku ta inkluí metabolismo di remedi i material tóksiko. Den e prosedura menshoná e sirugano ta ekstrae e parti di e igra ku tin e tumor. Pa por kalifiká pa e prosedura aki e igra di e pashènt mester ta den bon funshon i e pashènt ta den un bon estado di salú. Alabes, pa por prosedé e tumor no por ta krese dor di ardunan vital. Ta posibel pa saka te ku mitar igra tanten ku e sobrá órgano ta salú. Despues di e operashon, e pashènt por sigui biba un bida salu.
