Willemstad, 28 di yüli, 2021 – Miéntras e sifranan di COVID ta subi, mayoria pashènt ku COVID tratá na Curaçao Medical Center (CMC) no ta bakuná. “COVID tei pa keda, pues pa bo protehá bo mes di enfermedat severo, por fabor bai bakuná” segun Dr. Esther Rooijakkers, infeksiologo i spesialista di medisina interno na CMC. Rooijakkers ta bisa ku mayoria pashèntnan ku COVID-19 severo no a risibí nan bakuna. Na e momentunan aki tin 7 pashènt hospitalisá di kua 4 a wòrdu atmití den kuido intensivo.
Segun Rooijakkers, e bakuna no ta un garantia di 100% protekshon, pero e ta hasi e chèns pa bo wòrdu infektá mas chikí i ta evitá ku pashèntnan por haña e malesa severo. Alabes, e ta bisa tambe ku probablemente e variante Delta ta kousando síntomanan leve bou di esnan ku a bakuná. Algun di e síntomanan akí ta enserá nanishi ku ta kore, doló di garganta, diarea, tosá, doló di múskulo i kansansio.
Miéntras CMC ta sigui e situashon di aserka i ta kla prepará pa tur senario, sitanan di pashèntnan, tratamentunan i proseduranan ta sigui normal. Ta avisá pa yega 30 minüt promé ku sita pa por tin sufisiente tempu pa parker i registrá trankil. Pa esnan ku ta bishitá nan sernan kerí, esaki ta posibel entre 11or di mainta i 1or di merdia i entre 5or di atardi i 7or di anochi. Reglanan di Tapa boka, distansia sosial i higiena di man ta keda vigente.
