CMC ta harma Hòspitènt komo medida di prekoushon

Willemstad, 22 di yüli, 2021 – Komo medida di prekoushon Outbreak Management Team (OMT) i Tim di kalamidat di Curaçao Medical Center (CMC) a tuma e desishon pa harma e hòspitènt atrobe na entrada di sala di Emergensia. Den e promé fase akí, e tènt lo funshoná komo un “Tèst straat” solamente pa empleadonan di CMC ku mester tèst pa COVID-19. CMC su regla pa tèst empleado ta hopi stringente i ta tèst asina ku tin UN síntoma ku por ta relashoná ku COVID-19. Esaki ta nifiká ku CMC ta èkstra alertá pa evitá un plamashon di COVID-19 den hòspital. CMC ta un mikrokosmo di Kòrsou, pues no ta nada straño ku tin 6 empleado di CMC ku a keda infektá pafó di hòspital i ku ta den isolashon na kas. 

Na momentu ku e kantidat di kasonan oumentá i CMC ta risibí mas ku 3 pashènt pareu ku COVID-19, e Hospitènt lo wòrdu konvertí na su funshon original ku ta pa evaluá pashèntnan ku bin hòspital pa motibu di emergensia ku sospecho di COVID-19.  Di e hòspitènt lo tuma desishon si e pashènt mester bai departamentu di COVID-19, Emergensia òf si e pashènt ta den estado pa por bai kas. Te na e momentunan aki e situashon na CMC ta bou di kòntròl ku solamente 1 pashènt interná pa motibu di COVID.

Si akaso bo ta eksperiensia síntoma di COVID-19, YAMA bo dòkter di kas ku ta evaluá si bo mester bai tèst òf si bo mester bai departamentu di Emergensia na CMC. Si bo tin síntoma, NO bin hòspital sin konsultá ku bo dòkter di kas.

Leave a Reply

Your email address will not be published.