WILLEMSTAD, 2 di aprel 2024 – Riba inisiativa di pediatranan Dr. Patricia Phillipi – van Arkel i Dr. Meindert Manshande, departamentu di pediatria ta insentivá nan pashèntnan pa hasi kambio den nan bida i kustumber i asina krea un bibá mas salú. Tin sufisiente indikashon pa konkluí ku dos tersera parti di e adultonan na Kòrsou tin sobrepeso, di kua mitar ta sufri di obesidat. Tambe mas ku un kuart di e muchanan ta drenta edat adulto ku sobrepeso.
Sobrepeso por hiba na konsekuensianan manera entre otro malesa kardiovaskular i diabètis tipo 2. Pues traha riba prevenshon ta di gran importansia. Prevenshon i biba un bida salú, ta kuminsá for di yòn.
For di òktober 2023, Dr. Philippi i Dr. Manshande, a inisiá un klùp di kaminata kual ta hiba e nòmber “Kana Dushi Club”. E inisiativa akí ta enserá ku muchanan di poliklínika di pediatria por inskirbí pa kana semanalmente ku e dòkternan i nan mayornan! Tur djaluna atardi, e muchanan ku ta parti di e klùp ta kana 2,5 kilometer huntu ku e dòkternan na Koredor, un área bunita i ‘safe’ banda di laman.
E idea a bin pa krea e oportunidat pa hasi ehersisio den grupo, na un lugá aksesibel i sin gastu di miembresia pa asina stimulá un i tur pa inkorporá ehersisio den nan rutina.
Ku e proyekto akí, e pediatranan kier mustra tur mucha na Kòrsou i nan mayornan ku move por ta gratis, no ta difísil, i ku divertishon. Durante e kaminata, e pashèntnan (i nan mayornan) por papia ku e dòkter(nan) tokante tur kos, pues tambe tokante alimentashon i un bida salú. Na mitar di e kaminata, tin un seshon di Zumba; esaki ta duna hopi alegría na e muchanan!
Dr. Philippi i Dr. Manshande ta motivá un i tur pa djòin, kualke persona ku ta pensa ku nan yu mester move un tiki mas, ta bon biní. Mayornan òf representante legal di e mucha(nan) mester kana huntu ku nan i keda responsabel pa nan seguridat. Pa mas informashon por fabor tuma kontakto na 681-3163 (solamente Whatsapp). Pa registrá por skèn e kódigo QR akí i yena e formulario of klek riba e lenk aki.
