Willemstad, 15 di novèmber, 2021 –Ku un aña mas pisá tras di lomba, Curacao Medical Center (CMC) ta reflehá riba su retonan y e logronan. Apesar di un aña hopi turbulento, e famia di CMC a sigui pusha y yega na algun logro hopi importante manera e akuerdo entre islanan BES ku a amplia e oportunidat pa por risibí fondo di servisionan na pashèntnan den region. No opstante e retonan i situashon aktual, direktiva lo sigui hiba e lucha pa garantisá kalidat di kuida na nos komunidat, segun sra. Karina Lombardi (CFOO). E retonan di mas grandi a enserá e gòlpinan finansiero y e preshon riba personal pa motibu di COVID-19. Na vários okashon den transkurso di aña CMC mester a kanselá operashonnan elektivo pa por a garantisá kuido di emergensia, agudo y esnan esensial. Esaki a sosodé na mart i ougùstùs 2021 pa motibu di COVID-19 (manera e aña anterior) y na òktober 2021 pa motibunan finansiero komo resultado di fondonan ku CMC no a risibí di SVB.
E pandemia di COVID-19 a laga un marka profundo riba CMC, prinsipalmente riba e personal ku a “stretch” su mes den tur ángulo pa por duna e kuido nesesario. Na mart mester a eskala kuido pa pashènt di COVID-19 y entre otro a aktivá e hòspitent pa por kontrolá e fluho di pashèntnan ku COVID-19 ku ta yega hospital. Kuido Intensivo a pasa su kapasidat di 8 kama y yega na un total di 46 na Aprel. Den su pik, CMC a akomodá 145 pashènt ku COVID-19. Esaki a nifiká ku ta’tin mester mas asistensia di Hulanda, y tambe boluntarionan lokal. Alabes a aloká personal di CMC di diferente departamentu pa por a asistí. No ta solamente personal den kuido manera enfermeronan y spesialistanan a traha duru den hinter e temporada aki. Personal di tur e pilanan di e organisashon a kontribuí pa aliviá e situashon. Esaki a enserá personal di departamentu di limpiesa pa kushina, rekurso humano, atministrashon, seguridat, komunikashon,tékniko, ICT, finansiero y vários mas. Pues personal tabata agotá y hopi a bira malu pa e motibu akí. Ku ménos personal disponibel, e preshon a bira aun mas haltu, pero konhuntamente e famia di CMC pasa dor di e tempestat aki y a uni.
Algun di e momentunan mas bunita tabata momentunan ku komunidat di Kòrsou a sali dilanti pa mustra sosten na CMC. CMC ta apresiá kon nos hendenan a bin huntu pa duna sosten na e famia di CMC durante un “aplouso pa personal den kuido” y tambe pa medio di kontribushon di kuminda y snèk pa personal ku apénas ta’tin chèns pa tuma un “break.”
Un desishon ku a hasi doló na kurason di CMC tabata na momentu ku mester a limitá bishita di famia na pashèntnan hospitalisá. Mirando e doló ku esaki a kousa na famianan y na pashèntnan, CMC a aktivá mesora y a instalá un tim pa un proyekto di “Stay Connected” pa por hasi un konekshon virtual di pashèntnan ku nan famianan. Pa esaki tambe CMC a risibí donashon di vários tablèt di empresanan y personanan den nos komunidat.
Na momentu ku e porsentahe di e komunidat bakuna a kuminsá subi, CMC a kuminsá mira un bahada den e kantidat di pashèntnan ku tabata drenta hospital. Asina por a kuminsá normalisá servisionan atrobe y sigui mantené e enfoke di “Sirbi ku Amor.”
Den e último aña ku a pasa, hunta di komisario a nombra Sr. Gilbert Martina komo e direktor General di CMC ku e meta pa mehora kalidat di servisio y realisá akreditashon di JCI den e próksimo 3 añanan. CMC a kuminsá kana e trayekto pa e logro aki for di òktober 2020. Segun Sr. Martina “e akreditashon di JCI lo buta Kòrsou riba mapa Internashonal ku kuido haltu pa nos pueblo, nos region i mundu. Esaki ta nifiká kuido na e momentu apropiá, na e preis adekuá y na e lugá rekerí.”
Prof. Dr. Ingemar Merkies, direktor Médiko di CMC ta remarká : “For di fondo di mi kurason, danki na tur miembro di e famia di CMC pa boso dedikashon na nos pashèntnan, pa boso perseveransia aunke boso ta hopi kansá. Danki pa sirbi nos komunidat. Nos di gerensia ta sumamente gradesido y orguyoso di ku kada un di boso.
Pa rekordá e aña ku a pasa y pa mustra apresio na personal riba CMC su di 2 aniversario, un grupo di personal mes a organisá un dia di bienestar y salu pa yuda otro trese balanse bek. Un danki ta bai na e tim aki ku a tuma e tempu pa un regalo balioso di personal pa personal.
