Willemstad, 2 di mart, 2026 – Resientemente Curaçao Medical Center (CMC) a ekspresá preokupashon serio tokante salú di nos komunidat ku ta bayendo atrás. Partikularmente e oumento konstante di kasonan di diabétis i e kantidat kresiente di pashèntnan yòn. Na 2025 so, a diagnostiká nuebe mucha mas ku diabétis, mientras ku 12 otro ta hañando tratamentu pa obesidat i ta wòrdu konsiderá prediabétiko. E sifranan aki ta reflehá mas ku estadístika, nan ta mustra un reto urgente di salú públiko ku ta eksigí akshon di nos tur.
E impakto riba henter e isla ta mesun preokupante. Un di kada sinku adulto ta bibando ku diabétis. E malesa ta karga konsekuensianan serio a largu plaso, inkluyendo malesa di kurason, fayo di nir, daño na nervionan, amputashon i pèrdida di bista. E echo ku e malesa króniko aki ta kresiendo bou di gruponan di edat mas yòn ta enfatisá ku un realidat di awe ku ta afektá famianan tur dia.
Mas aleu di e impakto riba salú di nos komunidat, e peso kresiente di diabétis ta poniendo preshon signifikante riba nos sistema di kuido. CMC ya ta operá ku rekursonan limitá miéntras ta manehá e demanda kresiente pa kuido króniko, komplikashonnan i atmishonnan agudo relashoná ku diabétis. Hòspital aktualmente ta enfoká tur kapasidat disponibel riba manehá e demanda. Sinembargo, si e tendensia aki sigui, e sistema di kuido lo no por manehá e kresementu den futuro. Lista di espera i tempu di espera, ku ta rekerí esfuerso kontinuo pa kontrolá, ta kore riesgo di oumentá un biaha mas. Simplemente bisá, e ta kosta muchu ménos pa invertí den krea un komunidat mas salú ku pa kontinuamente ekspandé e infrastruktura di kuido pa trata un poblashon malu ku ta sigui oumentá.
Rekonosiendo ku niun instansia su só, por para e oumento aki, CMC i Ministerio di Salú, Medio Ambiente i Naturalesa (GMN) ta konsientisá tokante prevenshon i biba salú. Kambio signifikante lo rekerí e envolvimentu di henter e komunidat for di famianan, skolnan, dunadónan di trabou, dunadónan di kuido, esnan ku ta traha maneho, te na sosiedat sivil.
Tambe ta aserká partnernan korporativo pa sostené e esfuerso aki aktivamente dor di amplifiká e mensahe den nan organisashonnan i ekstendé alkanse den e komunidat mas amplio kaminda nan ta mira oportunidat i influensia. Dunadónan di trabou ta hunga un ròl krusial den forma kustumbernan diario, bienestar na trabou i konsientisashon di famia. Dor di enbolbí lidernan di negoshi, CMC ke krea un efekto ku ta ekstendé mas aya di muraya di hòspital i den kasnan, lugánan di trabou i barionan.
Miéntras ku diabétis ta afektá tur edat, e luna aki e esfuersonan lo enfoká spesífikamente riba e generashon mas yòn. Prevenshon no ta kuminsá ku un adulto, e ta kuminsá trempan den bida, asta promé ku nasementu. Eskohonan salú promé i durante embaraso ta influensiá e riesgo di un mucha riba término largu. Nutrishon materno apropiá, mantenshon di un peso saludabel, bon kuido prenatal i fomentá estilonan di bida aktivo for di infansia ta krea e fundeshi pa un futuro mas saludabel. Asta kustumbernan chikitu i konsistente manera un kaminata di 30 minüt tur dia por hasi un diferensia signifikante. CMC a oumentá su seshonnan grátis di “Sperando Bida” pa kada dos luna pa mayornan en espera i entrante ougùstùs lo ofresé seshonnan grátis di nutrishon pa e promé 1,000 dianan di un beibi.
Pa kambia e tendensia aktual lo tuma tempu, persistensia i union. E kampaña aki ta marka e komienso di un esfuerso sostené, di henter komunidat pa protehá salú di nos muchanan i sigurá futuro di Kòrsou. Dor di para huntu institutonan di kuido, gobièrnu, negoshinan, skolnan i famianan por redusí preshon riba nos sistema di kuido, protehá futuro generashonnan i konstruí un isla mas fuerte i salú pa futuro.
