Willemstad, 26 di novèmber 2021 – Curaçao Medical Center (CMC) a trasladá e último ekipo médiko, LINAC(Linear Accelerator), for di SEHOS pa su departamentu di radioterapia. Awor CMC tin 2 LINAC. E funshon di e LINAC ta pa proveé radiashon pa pashèntnan ku kanser. E ekiponan aki ta sigurá kalidat haltu di kuido mirando ku ta posibel pa atministrá un dosis mas haltu di radiashon dirèkt na un tumor ku mas presishon i ménos rísiko pa órganonan den e área di e tumor, segun Omar Arias, físiko médiko di CMC. Awor ku e dos ekiponan aki ta serka banda di otro, e trabou di e laborantenan di radioterapia ta bira mas efisiente i por sirbi dos pashènt pareu.
Alabes, e dos ekiponan ta fungi komo back-up na momentu ku mester hasi mantenshon. Kanser di pechu ta konsistí di un serie di 15 tratamentu den 3 siman i tratamentu di kanser na prostat ta enserá un serie di 37 tratamentu den 7 siman. Tur dos ta ehèmpel di tratamentunan ku mester tuma lugá sin interupshon. Segun Lucien Zuiverloon, Laborante di Radiologia, “ku e dos aparatonan aki instalá seka nos, nos por garantisá ku tratamentunan ta sigui semper. Pues awor radioterapia ta 100% ekipá.”
E proseso di mudansa i instalashon tabata un sumamente kompliká pa motibu di e presishon rekerí i a tuma un tim di mas o ménos 20 persona, inkluyendo físiko médiko, laborantenan, téknikonan i ekspertonan Internashonal.
