Willemstad, 29 di sèptèmber, 2021 – Den e rueda di prensa di awe mainta, gerensia di Curaçao Medical Center (CMC), a anunsiá ku mester para tur kuido elektivo spesífikamente pa pashèntnan di SVB entrante promé di òktober pa motibu ku e presupuesto di kuido ku SVB ta pagando pa 2021 no ta yega pa kubri gastunan di e pashèntnan di SVB. Lo por reanudá kuido elektivo pa pashènt di SVB na yanüari 2022 na momentu ku CMC risibí e presupuesto di e aña nobo. Kuido elektivo ta tratamentunan ku ta planiá delantá i ku no ta un emergensia. Tur sita di poliklínika lo sigui normal pa tur pashènt, inkluso esnan di SVB.
CMC a bin ta bati alarma ya mas ku 20 luna, indikando ku pa por kubri tur gastu di pashèntnan, mester apliká tarifanan di e situashon nobo di nos kadena di kuido kaminda a skohe pa un hòspital ultra moderno. E tarifanan di e lei Lb MTSV (Medisch Tarief Sociale Verzekeringen) di añanan 2000 ku ta wòrdu apliká pa traha e presupuesto no ta sostenibel i no ta yega pa kubri e gastunan aktual. E desishon pa para kuido elektivo pa pashèntnan di SVB, ta pa por baha gastu i pa asina por garantisá kuido agudo i kuido esensial na tur momentu. Ademas di e gastunan regular, den e último aña, CMC mester a kubri gastunan adishonal di COVID-19, un èkstra di ANG 13.6 mion na gastu. Alabes a realisá prestashon di kuido na pashèntnan di COVID-19 na balor di ANG 29.8 mion, kual ta sèn ku tabata destiná pa kuido elektivo. Pa loke ta trata gastunan di CMC, 75% ta gastunan fiho, pues esakinan ta keda meskos sea ta trata 1 pashènt òf 300 pashènt.
E desishon pa para kuido elektivo pa pashèntnan di SVB tin un impakto signifikante riba komunidat di Kòrsou mirando ku 85% di gastunan di pashènt ta bin di pashèntnan di SVB. E montante ku SVB a paga pa e pashèntnan aki pa 2021 a kubri te fin di ougùstùs. Na total, for di inisio di CMC, tin un diferensia di ANG 51.1 mion entre e entrada di e presupuesto ku a risibí di SVB i e presupuesto aktual di CMC. E fondonan di SVB ta basá riba e tarifanan di Lb MTSV miéntras e presupuesto di CMC ta basá riba e tarifanan nobo ku ta tene kuenta ku tur gastu operashonal di e hòspital.
E situashon finansiero aktual ku CMC ta aden ta pa vários motibu: Presupuesto di kuido ku no ta sufisiente, gastunan adishonal di Covid i otro gastunan adishonal imprevisto na inisio di e hòspital nobo. Na inisio di hòspital, gobièrnu di Kòrsou a hasi algun eskoho ku tin konsekuensia riba e likides di CMC pa un término largu. Entre otro restrukturá kadena di kuido kompletu, traha un hòspital ultra moderno, garantisá empleo di tur trahadó di SEHOS i e desishon ku e finansiamentu i pago di gastunan di konstrukshon mester bin di rekursonan di hòspital.
CMC a hasi vários esfuerso pa mantené i baha gastunan di hòspital di kual ta inkluí re-negoshá kòntraktnan vigente di material i remedi di kuido. Alabes a hasi análisis i a tuma akshon pa baha gastunan manera esnan relatá na laboratorio. CMC ta sigui den kombersashon ku gobièrnu pa por yega na un solushon pa komunidat di Kòrsou.
