Willemstad, 24 di òktober, 2021 – Den un karta fechá 20 di òktober, 2021, Inspektor di Salubridat, Prof. Sirving Keli ta eksigi pa Curaçao Medical Center (CMC) kontinuá ku kuido elektivo pa pashèntnan di SVB entrante djaluna 25 di òktober, 2021. Pero esaki no ta responsabel sin e fondonan pa kubri e gastunan di material i remedi. Si kontinua e servisionan aki sin e fondonan rekerí, lo por tin konsekuensianan fatal pa pashèntnan di emergensia, kuido agudo òf ku mester di kuido esensial entre e próksimo luna te ku fin di aña.
Den un karta di djadumingu 24 di òktober, CMC ta splika Inspektòr ku CMC su deber ta pa kumpli ku tur kuido di emergensia i tratamentunan agudo i esensial. Ademas di ta un responsabilidat étiko médiko esaki ta rekerí pa lei tambe. Pues si CMC kontinuá kuido elektivo pa pashèntnan di SVB na e momentunan aki, esaki lo tin komo konsekuensia ku lo yega un punto den e próksimo lunanan ku no tin e material ni e remedinan nesesario pa por ehèmpel trata un pashènt ku mester dialisá, risibí kemoterapia, radioterapia, òf den un aksidente.
Komo un instituto di kuido, CMC ta responsabel pa kuido di tur pashènt, i alabes ta responsabel pa e funshonamentu ekonomiko di e hòspital. Den e “landsverordening” ku Prof. Keli ta referí na dje tambe ta indiká ku CMC tin ku funshoná na un manera responsabel. Un paro di kuido elektivo pa seguradonan di SVB ta e úniko solushon responsabel pa CMC por garantisá ku pashèntnan ku ta rekerí kuido di emergensia, agudo i esensial por risibí nan tratamentunan médiko te ku fin di aña.
CMC ta lamentá profundamente ku a yega na e punto aki despues di diferente intento inkluso kartanan pa instansianan i minister konserní i apelashon den korte pa yega na un solushon konkreto riba e presupuesto di kuido. Pero ta indiká ku na momentu ku risibí un konfirmashon di e fondonan nesesario, CMC lo ta kla prepará pa start bèk ku e kuido elektivo.
