Willemstad, 28 di òktober, 2021 – Curaçao Medical Center (CMC) lo kuminsá bèk ku kuido elektivo pa
pashèntnan di SVB entrante di djaluna, 1 di novèmber. CMC por a konfirmá esaki despues di a risibí notisia
ku Minister di Salubridat a manda instrukshon pa SVB transferí e fondonan pa CMC. E karta ofisial di SVB a
yega na direktiva di CMC ayera nochi. Den e karta akí SVB ta indiká ku lo transferí ANG 4.1 Mion komo un
adelanto entrante di e siman akí pa por kubri gastunan di pashèntnan di SVB pa e próksimo luna.
Ta importante pa tuma nota ku e adelanto di ANG 4.1 Mion no ta sufisiente pa kubri gastunan di
pashèntnan di SVB te ku fin di aña pero e ta krea espasio pa por kuminsá bèk ku e servisionan. Na
momentu ku CMC a risibí e notisia di e fondonan ku lo ta disponibel, e departamentu di planifikashon a
kuminsá kana e proseso pa tuma kontakto inmediato ku pashèntnan di SVB riba lista di espera pa por
programá e tratamentunan nesesario. E lista di espera total di hòspital ta konsistí di un total di 1,636
pashènt, di kual 1,529 ta pashèntnan di SVB. CMC ta spera di por redusí e lista aki mas lihé posibel. Mayoria
pashèntnan riba e lista di espera ta pa Ortopedia, Sirugia, Ginekologia.
Den kurso di fin di novèmber lo mester evaluá un bes mas si tin sufisiente fondo pa kontinuá ku kuido na
desèmber.
