WILLEMSTAD, 28 di mei, 2024 – Curaçao Medical Center [‘CMC’] tin e potensial pa bira e mihó hòspital den Karibe. E ekiponan médiko modèrno di e hòspital huntu ku e personal (médiko) kapasitá, ta aportá diariamente na e meta aki. Sinembargo, e hòspital ta enkontrá retonan diariamente, di kual finansas ta esun prinsipal. Awe, CMC a organisá un konferensha di prensa pa brinda e públiko ku un aktualisashon tokante e situashon di CMC. Durante e konferensha di prensa tabata presente Sr. Gilbert Martina (Direktor General), Prof. Dr. Ingemar Merkies (Direktor Médiko), i Sra. Karina Lombardi (Direktor di Finansas i Asuntonan Operashonal), representando CMC, i Sr. Dito Garmers, Direktor General di CMC “Vastgoed & Beheer”. Temanan ku a presenta durante e konferensha di prensa ta, rapòrtnan finansiero, kalidat di kuido, rapòrtnan di investigashon di KPMG, lista di espera pa operashon i sita na poli klínika. Direktor General, Sr. Gilbert Martina, a menshoná ku e situashon finansiero aktual ta di hopi urgensia i ta rekerí atenshon urgente di Gobièrnu.
Sr. Martina a menshoná ku tur rapòrtnan finansiero a terminá pa e añanan 2020, 2021, i 2022 i a wòrdu aprobá pa e accountant. Sinembargo, e situashon finansiero aktual di CMC ta di hopi urgensia i ta rekerí atenshon urgente di Gobièrnu. CMC ta rekerí un solushon duradero pa su retonan finansiero pa por sigui sostené su stándart di kuido aktual. Sra. Lombardi a indiká ku si no yega na un solushon den e próksimo dos simannan i pa por sigui kumpli ku operashonnan, CMC mester tuma medidanan temporalmente manera suspendé kuido elektivo i kontinuá ku kuido agudo i esensial.
Sr. Martina a menshoná ku e motibu prinsipal pa e défisit ta debí na e tarifanan di hòspital i e kresementu den demanda pa kuido hòspitalario ku no ta wòrdu rekonosé.
CMC ta kompará su resultado di kuido ku algun hòspital na Hulanda pa midi e kalidat di kuido na CMC. Un medida importante di e evaluashon di kalidat di kuido, manera menshoná pa Sr. Martina, ta e índise di mortalidat. E índise di mortalidat na CMC aktualmente ta na un promedio di 2.38% segun e promé kuartal di 2024, kual ta bou di e promedio di industria di 2.43% kompará ku hòspitalnan di grandura similar i tipo di kuido ku ta wòrdu ehersé.
Además, Sr. Martina a enfatisá ku e lista di espera aktual ta debí na e hecho ku CMC a adoptá e lista di espera for di St. Elisabeth Hòspital i tambe e krisis di COVID-19 ku a kousa pa un pousa temporal den kuido elektivo di salú. Adishonalmente, Sr. Martina ta menshoná ku Landsverordering Normering Topinkomen” (LNT) ta krea retonan pa rekrutamentu di spesialista, kual tambe ta korelá ku e lista di espera aktual.
En konklushon, Sr. Martina i e Hunta di Direktiva di CMC ta konvensí ku CMC tin e potensial kompletu pa bira e mihó hòspital den Karibe, miéntras medidanan ta wòrdu tumá pa oumentá e presupuesto di finansiamentu di hòspital i krea un struktura di finansiamentu mas óptimo.
Fin di Komunikado di Prensa
