Willemstad, 30 di yüni, 2026 – Spesialistanan i investigadónan di Curaçao Medical Center (CMC) a presentá nan investigashonnan durante e di 5 Dutch Caribbean Research Week, ku a tuma lugá na University of Curaçao (UoC) ku sosten di The Dutch Research Council (NWO). E investigashonnan ta trata di algun di e desafionan di salú mas importante ku nos komunidat ta enfrentá.
E evento hasí anualmente a reuní profeshonalnan di kuido i investigadónan for di tur e paisnan den Karibe Hulandes pa kompartí konosementu i traha huntu riba solushonnan pa mehorá e kuido di salú den nos region. E presentashonnan di CMC a pone enfoke riba investigashonnan tokante kuido neurológiko di emergensia, malesa di sikkelcel i salú maternal; tres tema ku tin un impakto dirèkt riba e bienestar di habitantenan di Kòrsou i e islanan bisiña.
Dr. Ellianne dos Santos Rubio, neurosirugano na CMC i kandidato pa un PhD na Leiden University Medical Center, a presentá su investigashon riba manera di mehorá e traslado médiko di emergensia entre e islanan Hulandes den Karibe. Su trabou ta evaluá oportunidatnan pa “task-sharing” i entrenamentu spesialisá ku por redusí retraso den kuido neurológiko di emergensia i oumentá akseso na tratamentu ku por salba bida pa pashèntnan ku kondishonnan serio di seleber i sistema nervioso.
Dr. Meindert Manshade, dòkter di mucha na CMC, a presentá resultadonan ku ta mustra ku malesa di sikkelcel ta afektá aproksimadamente un di kada 300 yu resien nasí na Kòrsou, mientras ku mas ku 5% di e poblashon ta karga e rasgo di sikkelcel. E resultadonan ta enfatisá e nesesidat di fortifiká e programa di screening pa yunan resien nasí, pa muchanan por wòrdu diagnostiká mas lihé i risibí tratamentu na tempu pa prevení komplikashonnan.
Dr. Nurah Hammoud, ginekólogo na CMC, huntu ku Sitaya Zomer, investigadó PhD na Vrije Universiteit Amsterdam (VU), a presentá investigashon ku ta enfatisá e balor di fortifiká kuido maternal dor di apliká e kuadro di “Maternal Near-Miss” di Organisashon Mundial di Salú (WHO). Nan investigashon ta mustra ku monitoriá komplikashonnan severo durante embaraso, huntu ku mortalidat maternal, por yuda profeshonalnan di salú identifiká riesgo mas tempran, mehorá e kalidat di kuido i kontribuí na embarasonan mas sigur i mehor resultado pa e mama i yu resien nasí.
Investigashon ta un instrumento esensial pa komprondé e desafionan spesífiko di salú ku nos komunidat ta enfrentá i pa identifiká oportunidatnan pa sigui mehorá e kuido di pashènt. Dor di invertí den investigashon i kolaborashon regional, nos por sigui fortifiká nos sistema di salú i logra mihó resultado pa pashèntnan na Kòrsou.
CMC ta enfatisá ku e investigashonnan aki ta responde direktamente na e nesesidatnan di salú di nos komunidat, dor di promové diagnostiko mas tempran, miho kuido di emergensia i un kalidat di kuido mas haltu pa pashèntnan riba henter e isla. Den estrecho kolaborashon ku partnernan regional i internashonal, ku sosten di The Dutch Research Council (NWO), CMC ta sigui komprometé na inovashon, investigashon sientífiko i mehorashon kontinuo di e kuido di salú na Kòrsou.
