Willemstad, 5 di ougùstùs, 2026 — Curaçao Medical Center (CMC) a presentá muralnan nobo i material interaktivo pa hunga na su Departamento di Enfermeria di Mucha, kreando un ambiente mas kolorido i mas agradabel pa mucha ku ta risibí kuido. E proyekto a wòrdu patrosiná generosamente pa Curaçao Airport Holding (CAH) i Curaçao Airport Partners (CAP) i a keda inisiá i koordiná pa Ronald McDonald House Curaçao (RMH), reflehando un kompromiso kompartí pa hasi e eksperensia di hòspital mas kómodo pa mucha i nan famianan.
“Ta den un hòspital por ta algu deskonosí i spantoso pa un mucha. Pues lokual ku nos a krea ta muchu mas ku solamente arte. Ta trata di un ambiente kaminda mucha por sinti nan mes un tiki ménos spantá i mas na kas durante loke por ta un tempu di strès,” asina Claudia Rigaud, Direktora di Ronald McDonald House Curaçao, a duna di konosé.
E muralnan kolorido ta trese kalor, imaginashon i kòmfòrt na e Departamento di Enfermeria di Mucha. CAH i CAP a trese regalonan adishonal, den forma di material interaktivo pa hunga kune, pa duna un toke final na e muralnan i hasi e espasio ainda mas atraktivo pa e muchanan.
CMC i Ronald McDonald House Curaçao ta gradisí e artista, tur koordinador i tur persona ku a kontribuí di un òf otro forma pa hasi e proyekto aki un realidat. Kolaborashonnan manera esaki ta demostrá kon komunidat por uni pa trese mehorashonnan signifikante den e kuido i eksperensha di nos muchanan.
Ku e muralnan aki, ta spera di por trese kòmfòrt, speransa i felisidat pa kada mucha ku krusa e portanan di e Departamento di Enfermería di mucha.
