WILLEMSTAD, 23 di yüni, 2026 – Mas di 1.000 pashènt ta wardando mas ku shete siman pa un operashon na Curaçao Medical Center (CMC). E lista di espera a krese di 715 pashènt na mart te na 1.078 pashènt e siman aki. E oumento ta debí prinsipalmente na falta di personal den sala di operashon i preshon riba kapasidat di kama den hòspital.
E listanan di espera mas largu ta den Sirugia General, Oftalmologia (wowo), Ortopedia, Urologia i Sirugia Plástiko. E lista di espera tambe ta inkluí 79 pashènt ku a posponé nan operashon un òf mas biaha.
Aktualmente, CMC ta usa sinku di su shete salanan di operashon pasobra no tin sufisiente asistentenan di sala di operashon. Un sala ta reservá pa kaso di emergensia, loke ta laga solamente kuater sala disponibel pa operashonnan planifiká. CMC tin nuebe vakatura habrí pa asistente di sala di operashon i ta buskando personal nobo aktivamente.
Pa redusí tempu di espera, CMC a kuminsá ku un plan nobo pa baha e lista di espera. E plan ta inkluí revishon di e lista di espera, duna prioridat na pashèntnan ku e nesesidat mas urgente, mehorá e planifikashon di operashonnan, redusí anulashonnan evitabel i fortifiká e planifikashon di “ontslag” di pashèntnan.
Falta di kama den hòspital tambe ta sigui afektá e fluho di pashèntnan. Ainda un total di 18 pashènt ta keda interná miéntras nan ta warda un lugá den sentronan di kuido, loke ta limitá e kantidat di kama disponibel pa otro pashèntnan.
“Ku mester warda pa un operashon por ta un strès pa pashèntnan i nan famia. Nos ta keda transparente tokante e retonan ku nos ta enfrentá i e medidanan ku nos ta tuma pa mehorá aksesibilidat na kuido.” asina e Direktiva di CMC ta bisa.
CMC lo sigui monitòr e desaroyo di e listanan di espera i traha huntu ku partnernan den kuido i outoridatnan pa mehorá e fluho di pashèntnan i redusí retrasonan den kuido planifiká.
