Teatro Gilat ta kuminsá ku presentashon na CMC

Willemstad, 25 di Yüni 2021 – Fundashon Gilat ta un fundashon ku ta sòru pa teatro pa muchanan den hòspitalnan na Hulanda ta bai kuminsá ku presentashon virtual pa muchanan den hòspital na Kòrsou tambe. For di e luna entrante lo kuminsá ku presentashonnan tur luna pa e muchanan di Curaçao Medical Center i otro muchanan na Kòrsou ku tambe ta ménos bon di salú. Minister di Salubridat Públiko, Medio Ambiente i Naturalesa sra. Dorothy Pietersz- Janga i tambe minister di Desaroyo Sosial, Labor i Bienestar sra. Ruthmila Larmonie Cecilia tabata tei presente pa e promé presentashon ofishal. E presentashon a tuma lugá djabièrnè 25 di yüni 2021 na Ronald Mc Donald House of Charity.

E presidente di Gilat Jair Eisenmann: “Teatro ta e mihó medisina pa muchanan den hòspital. Ku teatro nos por yuda nan lubidá pa un momentu ku nan ta malu. Ta hopi bon ku nos por pone un sonrisa riba e kara di e muchanan ku ta malu.”

Dr. Meindert Manshande ku ta dòkter di mucha ta kontentu ku Fundashon Gilat ta aktivo awor tambe na Kòrsou: “Mi ta haña fantástiko ku ta ofresé e muchanan di hòspital e oportunidat pa por disfrutá di e forma aki. Mi konosé Fundashon Gilat for di tempu di e hòspital akadémiko na Amsterdam i ta hopi speshal ku awor nos por tin presentashon pa e muchanan na Kòrsou.

Fundashon Gilat a kuminsá den aña 2012 i ta organisá teatro interaktivo pa muchanan den hòspitalnan akadémiko na Amsterdan, Rotterdam, Den Haag, Utrecht i Groningen. E fundashon a ser establesé na memoria di Gilat Eisenmann ku a pasa mayoria parti di su bida den hòspital. Riba potrèt por mira e momentu ku e muchanan tabata hungando Bingo virtual.

Leave a Reply

Your email address will not be published.