Willemstad, 5 di Yüni 2021 – Curaçao Medical Center manera ta konosí kaba ta bezig ku e akreditashon internashonal di JCI. Resiklahe ta un parti importante di e trayekto aki. Den kuadro di dia internashonal di medio ambiente, CMC huntu ku Ronald McDonald House Charities (RMHC) a organisá seshonnan di informashon resiklahe pa e departamentu di limpiesa di CMC. Durante di e seshonnan di informashon aki Sabine Berendse di e kompania di resiklahe Green Phenix a duna un presentashon pa konsientisá e empleadonan riba e tereno di resiklahe, informá nan e importansia pa forma parti di e proyekto i tambe kiko CMC kier logra ku e proyekto aki. Kada un di e empleadonan di e departamentu di limpiesa i boluntarionan di RMHC ta fungi komo un embahador pa proyekto aki ku e intenshon di sigui plama e informashon i konosementu serka e sobra empleadonan pa huntu nos kontribuí na e bienestar di nos ekonomia i tambe na e bienestar di CMC.
E parti mas bunita di e proyekto aki ta ku tur e plèstik di CMC ku wòrdu kolektá ta wòrdu resiklá i usá pa traha produktonan di uso den CMC mes. Algun ehèmpel di esakinan ta sèt di stul pa e muchanan den e departamentu di mucha, banki i mesa pa pone den ‘healing garden’ etc. Danki na RMHC pa forma parti di e proyekto aki i duna su aporte tambe dor di sòru pa e kònteinernan di sushi di resiklahe ku nos a risibí di Coca Cola. Esaki ta djis e komienso di un bunita proyekto kaminda henter e famia di CMC lo forma parti di dje i tambe yuda nos medio ambiente i ekonomia dor di aportá na proyektonan di resiklahe. Nos kier hasi un yamada na tur bishitante di hòspital pa yuda nos ku e proyekto i tira tur plèstik i bleki di aluminio den e kònteinernan kòrá den Atrium ku ta spesífikamente pa kolektá materialnan pa resiklá.
