WILLEMSTAD, 20 di ougùstùs, 2026 – Curaçao Medical Center (CMC) ta boga pa mas konsientisashon ya ku investigashon ta revelá riesgonan serio di leshon asosiá ku un di e atrakshonnan mas popular di e isla. Desde apertura di CMC na 2019, 58 persona tabatin mester di kuido médiko di emergensia despues di bula for di baranka na Playa Forti, segun un estudio kondusí pa sinku studiante di medisina di Universidat di Groningen bou di supervishon di neurosiruhano di CMC Dr. Dos Santos Rubio.
E baranka ikóniko di Westpunt ta atraé bishitantenan di rònt mundu, ku hopi turista di entre 20 i 30 aña ta bula for di aproksimadamente 12 meter (40 pia) den laman. Miéntras ku e aktividat ta wòrdu mirá ampliamente komo un eksperensia di fakansi aventurero, e estudio ta enfatisá e potensial pa leshonnan severo di lomba. For di e 45 pashèntnan ku a hasi imágen médiko, mas ku 70% a wòrdu diagnostiká ku fraktura di lomba. E área mas komunmente afektá tabata e área torakolumbar, kaminda e parti ariba/mei mei (torásiko) di bo lomba ta topa ku e parti mas abou di bo lomba (lumbar). Mas o ménos un di kada sinku pashènt ku fraktura tabatin mester di operashon pa stabilisá nan wesu di lomba, miéntras ku otronan a eksperensiá komplikashonnan neurológiko òf tabatin mester di kuido hospitalario prolongá.
Na 2025, un turista merikano a fayesé despues di a bula for di baranka na Playa Forti, enfatisando mas ainda e konsekuensianan potensialmente devastador di e aktividat aki. E estudio tambe a haña ku un densidat di wesu mas abou por oumentá e riesgo di leshon. Investigadónan a señalá ku individuonan ku fraktura tabatin un densidat di wesu signifikantemente mas abou kompará ku esnan sin fraktura. Esaki ta sugerí ku bishitantenan di edat avansá, asta esnan ku ta aktivo i salú, por enfrentá un riesgo mas haltu di leshon serio.
E investigadónan ta enfatisá ku e kasonan raportá probablemente ta representá solamente parti di e berdadero impakto. Algun individuo kisas no ta buska kuido médiko despues di un salto, miéntras ku turistanan ku ta desaroyá síntomanan despues di bandoná Kòrsou no ta wòrdu inkluí den datonan di kuido médiko lokal. Ku turismo kresiendo, e kantidat di pashèntnan ku mester di kuido di emergensia despues di bulamentu di baranka por pone preshon adishonal riba rekursonan di kuido hospitalario. E investigadónan ta rekomendá pa fortalesé komunikashon di seguridat na Playa Forti i oumentá kolaborashon entre dunadónan di kuido, stakeholdernan di turismo, operadónan di ‘tour’ i outoridatnan lokal.
Aunke señalnan di atvertensia ta presente aktualmente na e sitio, e estudio ta lanta preguntanan tokante si e bishitantenan ta komprondé bon kla e riesgo di leshonnan severo na lomba promé ku tuma e desishon pa bula. CMC su meta no ta pa deskurashá aventura, pero pa sigurá ku bishitantenan ta komprondé e riesgonan i por hasi eskohonan informá. E investigashon aki a analisá datonan di pashènt di Curaçao Medical Center di 2019 te ku 2026 i ta enfatisá e importansia di prevenshon, konsientisashon i tumamentu di desishon informá pa redusí leshonnan evitabel.
