WILLEMSTAD, 10 di yüni, 2026 – Tur mucha mester por yega hòspital pa nan kuido médiko. Pero pa hopi famia na Kòrsou, transporte ta keda un barera grandi, loke ta pone ku e muchanan ta pèrdè nan sita, tratamentunan ta keda interumpí i tin ménos presensia di famia durante nan estadia na hòspital. Pa atendé e reto aki pa e famianan den nesesidat, Ronald McDonald House Curaçao a amplia su servisionan ku ‘Wheels of Love’, un programa di transporte ku ta yuda muchanan i nan mayor ku transporte di forma seif i konfiabel pa por yega Curaçao Medical Center (CMC). E transporte aki ta kordiná via di Ronald McDonald House Curaçao i Departamentu di mucha na CMC ku ta yuda ku e inskripshon via di un app.
Den un evaluashon, Ronald McDonald House Curaçao i CMC a identifiká transporte komo e nesesidat mas grandi bou di famianan ku yunan malu. A inisiá un programa piloto ku a permití muchanan ku malesa króniko pa por sigui ku tratamentunan esensial. Durante e programa piloto, dòkternan a indiká ku e kontinuidat di kuido a mehorá i a demostrá resultadonan positivo ku nan salú. Pues a lansa “Wheels of Love.”
“Akseso na kuido ta kuminsá ku por yega e sita,” asina Claudia Rigaud, Direktora di Ronald McDonald House Curaçao a bisa. “Wheels of Love ta kita un barera krítiko i sigurá ku muchanan por risibí e kuido ku nan mester miéntras ta yuda famianan keda serka durante e rekuperashon di nan yu.” E programa ta sostené muchanan ku mester di kuido médiko kontinuo, famianan ku ta enfrentá retonan di transporte, mayornan ku ta bishitá muchanan hospitalisá i inisiativanan di edukashon di salú den komunidat.
Wheels of Love ta kompletamente finansiá i sostené dor di spònsornan, prinsipalmente Curoil, tambe MCB i Baoase. Dor di mehorá akseso na kuido i fortalesé envolvimentu di famia, Wheels of Love ta kontribuí na mihó resultadonan di salú i un ambiente di sanashon mas sostenibel pa e muchanan di Kòrsou.
Pa mas informashon tokante ‘Wheels of Love’ òf pa sostené e programa, por fabor tuma kontakto ku Ronald McDonald House Curaçao: geraldine.penso@ronaldmcdonaldhouse.cw
