WILLEMSTAD, 5 di aprel 2024 – Komo reakshon riba e nesesidat kresiente pa fleksibilidat i e búskeda mundialmente pa un balansa entre bida personal i laboral, Curaçao Medical Center [‘CMC’] a evaluá i introdusí e posibilidat pa orarionan laboral semanal fleksibel (basá riba evaluashon di kapasidat nesesario di e departamentu konserní). Introdusiendo un areglo pa orarionan laboral fleksibel, CMC por krea un ésfera ku ta brinda su empleadonan e espasio pa prosperá tantu profeshonalmente komo personalmente. E areglo akí tin tambe e potensial pa atraé empleadonan nobo ku solamente ta disponibel durante orarionan fleksibel pero ku por kontribuí ku konosementu balioso.
Sektor di kuido ta unu di labor hopi intensivo den kual empleadonan dediká ta demostrá un kompromiso eksepshonal diariamente. Pa e motibu akí, e opshon no solamente lo oumentá e satisfakshon i envolvimentu di e personal aktual di CMC, pero tambe lo kontribuí na un nivel mas haltu di satisfakshon laboral. Tambe e lo kondusí na redukshon di strès i ‘burnout’. Orarionan laboral fleksibel den sektor di kuido ta mas komún internashonalmente, sin embargo esaki no ta un práktika komún den e sektor di kuido na Kòrsou i Karibe. Pa e motibu akí CMC ta posishoná su mes komo pionero den esaki i asina ta kreando un kaminda pa oportunidatnan i posibilidatnan nobo komo un di e prinsipal dunadónan di trabou riba e isla.
Tantu empleadonan aktual komo empleadonan nobo tin e oportunidat pa skohe pa orarionan laboral fleksibel entre 32 i 36 ora semanal. Esaki lo ser introdusí komo un proyekto piloto kual despues lo ser evaluá pa mas fleksibilidat. Mientras un siman ‘nòrmal’ di trabou lo sigui konsistí di 40 ora (ekskluyendo posibel oranan di overtaim no-struktural), orarionan laboral fleksibel lo ser implementá den departamentunan kaminda kapasidat ta brinda posibilidat pa esaki.
Skohiendo fleksibilidat ta duna empleadonan (potensial) e espasio pa manehá nan tempu mas efisiente i ta pèrmití nan pa krea un mihó balansa entre nan bida personal i laboral. Esaki ta brinda e oportunidat pa traha na un hòspital “state-of-the-art’ i haña eksperiensia mientras nan ta kombiná esaki ku nan famia i/òf estudionan.
Curaçao Medical Center ta duna un balor haltu na su kapital humano. CMC ta konsiente ku no obstante ku e sektor ta unu intensivo, CMC ta traha ku hende pa hende, pues CMC ta esforsá su mes pa implementá kambionan positivo den e búskeda di felisidat i un satisfakshon di empleado mas haltu.
