Willemstad 18 di yanüari 2023 – Un di e deseonan di empleadonan di Curaçao Medical Center (CMC) promé ku a muda pa e edifisio nobo tabata pa e hòspital por tin un gym. Debí na otro prioridatnan i falta di rekurso, CMC no por a kumpli ku e deseo aki.
Ehersisio ta un faktor importante no solamente pa kondishon físiko pero tambe salú mental i un bida saludabel. Pues miéntras ta kuida pashènt, nos koleganan tin e nesesidat pa krea maneranan pa biba salú i kuida nan mes tambe. Ku e pandemia di COVID-19 tras di lomba, nos a realisá e importansia pa trese e deseo original bèk. Pero, ainda no tin e rekursonan nesesario. Den proseso pa bin ku maneranan pa rekoudá fondo, e komishon sosial a bin ku e idea pa hasi un kaminata pa e kousa.
Na momentu ku Baoase Luxury Resort a tende di e inisiativa, nan a bula mesora riba e oportunidat pa kontribuí ku USD $9,550 for di fondonan ku a wòrdu rekoudá dor di nan turnoi di piskamentu. E turnoi tambe ta inkluí Moneyball, van der Valk hotels & restaurants, Winefactory, Mood Beach, Epic, Bucketlist and Blue Bay. CMC ta sumamente gradesido na Baoase pa a duna empleadonan di CMC un bon start pa por yega na e fondonan rekerí mas lihé.
E kaminata pa yega na e fondonan total lo tuma lugá djasabra 25 di Mart, 6 p.m. Pronto lo tin mas detaye riba e proseso di inskribí.
Mas abou por mira riba potrèt unda e área di ehersisio lo bai ta.
