Willemstad 10 di yanüari 2023 – Via di Kenley Jansen Foudation, Kenley i su kasa Gianni, vise presidente di e fundashon a hasi donashon di “Kenley’s locker” na e departamentu di mucha na Curaçao Medical Center (CMC).
“Kenley’s locker” ta parti di e programa di duna bèk na komunidat di fundashon Kenley Jansen. E lòkernan di marka Jansen ta konsistí di Ipad, Nintendo swith ku wega i lo por sirbi pa entretenimentu i distraishon pa muchanan ku ta hospitalisá na CMC.
Kenley i Gianni Jansen mes tambe tin yu. Na momento ku e yu mayó a keda hospitalisá na Merka pa un periodo kòrtiku, esei ta e momento ku e pareha a konstatá e skarsedat di kos di hunga i entretenimentu ku e muchanan tin den hòspital. Esaki tabata e momento ku e idea pa Kenley’s Locker a bini na mente pa krea e lokèrnan. E importansia di por tin sufisiente kos di hunga i entretenimentu pa muchanan no a bai pèrdí serka Gianni.
CMC ta sinti hopi bendishoná di por a risibí e regalo aki, pa asina ku e muchanan por keda den interakshon durante nan proseso di rekuperashon i distraí nan mente for di tur loke nan ta pasando dor di dje.
