Willemstad, 3 di sèptèmber 2026 — Curaçao Medical Center (CMC) a nombra Vincent Offerman, MSA, CPA, CGMA, komo Direktor di Finansas i Asuntunan Operashonal (CFOO) i ta bira e miembro nobo di Hunta di Direktiva. Esaki lo bai na vigor entrante 1 di novèmber 2026. Pa hopi den CMC, Offerman mester tiki introdukshon. Aktualmente e ta funshoná komo Direktor di Finansa i Kòntròl i a bin ta forma parti di CMC for di su apertura na 2019. Promé ku esaki e la funshoná komo Kontroladó Finansiero na Sint Elisabeth Hospital (SEHOS), kual ta duné eksperensia propio di e transishon di SEHOS pa CMC i e desaroyonan di e organisashon for di e tempu ei.
Ku su nombramentu, e Hunta di Direktiva di CMC lo konsistí di tres miembro: Johan de Graaf, Direktor General; Ludmilla Garmers, Direktor Médiko i Vincent Offerman, Direktor di Finansas i Asuntunan Operashonal. Miéntras ku kada miembro tin responsabilidatnan spesífiko, e tres miembronan ta konhuntamente i igualmente responsabel pa e maneho, direkshon i desaroyo total di Curaçao Medical Center. Offerman ta sigui e Direktor di Finansas Interino (CFO) Lorraine Diaoen.
Komo un profeshonal yu di tera, Offerman ta kombiná raisnan lokal ku edukashon i eksperensia internashonal. E tin un Master di siensia den kontabilidat (accounting) di Loyola University Chicago i ta sertifiká komo Kontadó Públiko Sertifiká i Kontadó di Maneho Global. Su karera ta inkluí posishonnan finansiero haltu den kuido, banko i kompanianan di auditoria.
“Vincent ta trese un kombinashon kual ta partikularmente di balor pa CMC na e momentunan aki: ekspertisio profeshonal fuerte, konosementu institushonal profundo i un komprondementu genuino di nos hendenan i nos konteksto lokal,” esaki e Hunta di Supervishon a indiká. “E tabata enbolbí di aserka den e trayekto di CMC for di e transishon i ta komprondé tantu e retonan ku nos ta enfrentá komo e oportunidatnan nos dilanti. Su nombramentu ta fortalesé e Hunta di Direktiva ku un lider eksperensiá ku ta profundamente komprometé ku e futuro di CMC i Kòrsou.”
Den su ròl nobo, Offerman su karteranan lo inkluí Finansas, IT, Fasilidat, Maneho di Kapasidat, Servisio Tékniko Médiko, i Kompra i Logístika. Pero komo miembro di Hunta di Direktiva, su responsabilidatnan ta ekstendé mas ayá di e áreanan akí. Huntu ku de Graaf i Garmers e lo karga responsabilidat mútuo pa e rendimentu general i direkshon stratégiko di e hòspital.
“CMC ta un organisashon ku mi konosé bon i tin hopi serka di mi kurason,” Offerman ta indiká. “Durante e añanan mi a mira e dedikashon di nos koleganan i nan kompromiso diario pa brinda kuido na nos komunidat. Mi ta ansioso pa por tuma e responsabilidat mas amplio aki huntu ku Johan, Ludmilla, nos tim di maneho i koleganan den henter CMC. Mi ta ansioso tambe pa fortalesé nos kolaborashon ku stakeholdernan eksterno i traha huntu pa hiba CMC dilanti.”
Offerman ta deskribí su bista di liderazgo komo unu ku ta ankrá den integridat, rèspèt, trabou den tim, responsabilidat i desaroyo di hende. Durante henter su karera el a dirigí i sostené timnan a traves di restrukturashon organisatorio, mehorashonnan finansiero, implementashon di sistema i otro prosesonan di kambio grandi. “Finansa i operashonnan fuerte ta esensial pa kuido sostenibel, pero nan no por wòrdu separá for di nos hendenan, nos pashèntnan i e kalidat i kontinuidat di kuido,” Offerman ta agregá. Su propio perfil di liderazgo ta enfatisá netamente e balansa ei entre responsabilidat finansiero, kontinuidat i kalidat di kuido, i e bienestar di e koleganan ku ta hasi e kuido ei posibel.
