Willemstad, 16 di sèptèmber 2026 – Curaçao Medical Center (CMC) ta hasi un yamada na Gobièrnu pa tuma urgentemente un desishon tokante finansiamentu struktural di e hòspital. Durante vários aña, CMC a informá Ministerio di Salú, Medio Ambiente i Naturalesa (GMN) i SVB formalmente ku e rekursonan finansiero disponibel pa e hòspital no ta sufisiente pa kubri e kuido nesesario ku ta brinda na pueblo di Kòrsou. A pesar di vários kombersashon, korespondensia formal i dokumentashon ku ta sostené esaki, ainda no a implementá un solushon struktural.
CMC a kalkulá ku den 2026 e tin mester di aproksimadamente XCG 236 mion pa brinda e kuido nesesario na pashèntnan di SVB. Sin embargo, segun proyekshon, CMC lo risibí solamente XCG 206,4 mion di SVB. Esaki ta laga CMC ku un défisit di aproksimadamente XCG 29,6 mion. E fondonan risibí te awor a wòrdu usá kaba pa paga e gastunan inmediato di hòspital.
Resientemente, Minister di Salú a indiká tambe ku lo pone un montante adishonal di XCG 10 mion disponibel den 2027. CMC ta sperando klaridat tokante e propósito, kondishonnan i momentu ku e fondonan aki lo bira disponibel, inkluso si nan ta destiná pa sostené mehorashonnan komo resultado di e negosiashonnan di CAO. Si e fondonan aki ta destiná pa kondishonnan laboral di empleadonan, no por presentá nan na mes momento komo un solushon pa e défisit operashonal i struktural eksistente di CMC.
Asta teniendo na kuenta ku e fondonan pa kuido ku CMC a risibí kaba, e posishon finansiero di CMC ta yega atrobe na un punto krítiko, manera a bin ta sosodé tur e añanan anterior. Segun e proyekshonnan aktual, for di kuminsamentu di novèmber e hospital ta kore e riesgo di no tin sufisiente likides pa kumpli ku tur su obligashonnan finansiero na tempu. CMC ta sigui mehorá su operashonnan i hasi uso responsabel di e rekursonan disponibel. Sin embargo, mehorashonnan interno so no por solushoná un problema struktural di finansiamentu ku ta pafó di kontrol di e hòspital, manera e rapòrt di KPMG di 2023 tambe a indiká.
Kuida nos pashèntnan ta nifiká tambe kuida esnan ku ta kuida nan
Kuido di pashènt di kalidat ta posibel solamente danki na e kompromiso di e empleadonan di CMC. Durante vários aña, nos profeshonalnan di salú i ekiponan di sosten a sigui sirbi pashèntnan bou di preshon operashonal, finansiero i personal ku ta krese kontinuamente.
Hunta di Direktiva ta rekonosé ku empleadonan a warda muchu tempu pa progreso den nan kondishonnan laboral i ku e proseso di CAO a dura mas largu ku mester. Nos koleganan ta meresé rekonosementu, kondishonnan laboral hustu i un perspektiva kla pa futuro.
CMC ta komprometé pa sigui avansá e negosiashonnan di CAO di un manera responsabel. Sin embargo, akuerdonan ku empleadonan mester ta finansieramente sostenibel tambe. P’esei, finansiamentu struktural ta esensial, no solamente pa protehá kuido di pashènt, sino tambe pa invertí den i retené e personanan ku ta brinda e kuido ei tur dia.
Medidanan temporal no ta solushoná e problema fundamental
CMC ta sostené medidanan médikamente responsabel pa redusí listanan di espera pa sirugia i yuda pashèntnan risibí kuido mas lihé. Sin embargo, uso di fondo públiko pa kuido temporal no ta solushoná e problema fundamental ku e hòspital propio di nos isla ta enfrentá. Pashèntnan lo sigui dependé di CMC pa kuido di emergensia, diagnóstiko, kuido despues di tratamentu i tratamentu di posibel komplikashonnan. P’esei, kualke finansiamentu pa kuido eksterno temporal mester ta adishonal i no mag redusí e rekursonan ku CMC tin mester pa sigui funshoná.
CMC ta kere ku kada habitante di Kòrsou tin derecho riba kuido di salú aksesibel, sigur i di kalidat haltu. Un CMC ku ta finansieramente sostenibel ta esensial pa protehá e derecho ei i pa sostené e empleadonan ku ta hasi e kuido ei posibel.
Despues di vários aña di kombersashon, no ta responsabel pa sigui retardá finansiamentu struktural di CMC. Loke ta nesesario awor ta klaridat, responsabilidat i desishonnan konkreto.
