Willemstad, 6 di òktober 2026 – Hunta di Direktiva di Curaçao Medical Center (CMC) ke klarifiká algun punto despues di deklarashonnan resien di Minister-President den Parlamento. CMC a tuma medidanan pa kontrolá gastunan i traha di un manera mas efisiente, manera ta rekomendá den e rapòrtnan di KPMG ku Gobièrnu a referí na dje. Sin embargo, e saneamentu di debenan akumulá te ku 2024 no a tuma lugá ainda. Apesar di tempu largu di deliberashon ku Gobièrnu, ainda no tin un desishon definitivo tokante e saneamentu i su implementashon. “Komo direktiva, nos ta haña importante ku nos pashèntnan, koleganan i komunidat ta komprondé dikon e hòspital ta sigui enfrentá défisit finansiero, apesar di mehorashonnan i sosten finansiero temporal, i kiko esaki por nifiká pa kuido di pashènt,” segun e Direktiva.
CMC a implementá medidanan di e rapòrtnan di KPMG pa kontrolá gastunan i hasi mihó uso di personal, medionan i fasilidatnan. Un ehèmpel konkreto ta kompra di remedi huntu ku otro hòspitalnan, pa CMC por haña nan na un preis mas abou. “P’esei, nos no ta di akuerdo ku e idea ku CMC no a hasi nada ku e rekomendashonnan aki. Nos ta traha konstantemente riba mas mehorashonnan,” e Direktiva a indiká.
Pero traha mas efisiente no ta kompensá tur oumento di gastu. Meskos ku famianan ta sinti ku preisnan den supermerkado i na pòmp di gasolin ta subi, e hòspital tambe ta enfrentá gastunan mas haltu pa remedi, material médiko i energia, entre otro. Na mes momentu, e nesesidat di kuido ta sigui krese. Trata mas pashènt ku malesanan ku mas kompleksidat ta eksigí mas tempu di personal i mas medio.
P’esei, ademas di kontrolá gastunan, ta nesesario pa tin akuerdonan tokante finansiamentu di e kuido ku CMC ta duna realmente. CMC a analisá e kambio den e nesesidat di kuido i e servisionan ku a ser brindá, i a presentá e resultadonan na SVB. E análisis aki lo ser kompartí ku Gobièrnu tambe.
E rapòrtnan di KPMG ta kontené rekomendashonnan ku ta eksigí akshon di Gobièrnu i SVB tambe.
Si finansiamentu struktural, esta finansiamentu sufisiente i sigur pa e kuido di kada aña, no ta yega, e problemanan di falta di plaka disponibel por bira mas serio. Esaki por hasi ku CMC no tin sufisiente plaka pa hasi pagonan nesesario na tempu. Kumpra remedi, material i ekipo médiko por bira mas difísil, ku posibel konsekuensianan pa e hòspital por sigui brinda kuido. “Komo Direktiva, nos ta tuma e riesgo aki na serio. Nos ta sigui traha riba kòntròl di gastunan i akuerdonan konkreto di finansiamentu pa sostené e kuido pa nos pashèntnan,” e Direktiva a indiká. E intenshon pa sanea e debenan akumulá te ku 2024 a ser ekspresá i e akuerdo a ser hasí, pero ainda no a ser implementá.
Sanea debenan bieu i duna sosten finansiero temporal no ta solushoná outomátikamente e falta di finansiamentu pa e kuido di awe. Por kompará esaki ku un kas: paga un debe bieu ta yuda, pero e entrada di kada luna mester sigui ta sufisiente pa paga e kuentanan koriente. P’esei, CMC tin nesesidat di tantu saneamentu di debe komo finansiamentu sufisiente pa e kuido ku e ta brinda kada aña.
Al final, pa pashèntnan ku ta wardando pa tratamentu, loke ta mas importante ta risibí kuido sigur i na tempu. Hunta di Direktiva ta habrí pa kolaborashon ku ta kontribuí na esaki. Akuerdonan kla tokante kalidat, finansiamentu, responsabilidatnan i kuido despues di tratamentu ta esensial. CMC ta sigui traha riba mehorashonnan den e hòspital i akuerdonan konkreto ku Gobièrnu i SVB. E meta ta kuido aksesibel, sigur i ku finansiamentu sufisiente pa por sigui brind’é, ku informashon kla pa pashèntnan, koleganan i komunidat.
Mas aleu, dia 23 di sèptèmber 2026, e Direktiva a kontestá formalmente riba e kambionan proponé den e struktura di direktiva i supervishon. Aki Hunta di Direktiva a indiká ku e ta dispuesto pa adaptá e struktura na e kódigo di bon gobernashon di e Pais, inkluyendo partisipashon di e konsehero independiente di Corporate Governance, SBTNO. E Hunta di direktiva ta na espera di un kontesta di Gobièrnu.
