Willemstad, 6 di Aprel 2021 – Curaçao Medical Center ta sigui ku su responsabilidat di ekstendé kuido hospitalario na tur pashènt ku COVID-19 ku mester di esaki. Ounke e situashon den CMC ta hopi kritiko ku e kantidat di pashèntnan oumentando diariamente, CMC lo keda hasi lo máksimo pa kuida nos komunidat. E kuido aki ta enserá ku pashèntnan ku bou di sirkunstansianan normal lo a risibí kuido di hòspital lo risibí e kuido di COVID-19 nesesario pa asina lew ku tin espasio i personal disponibel.
Na e momentunan aki tin 121 pashènt den CMC, di kual 32 ta den Kuido Intensivo. A amplia te ku un total di 160 kamber den CMC pa por trata pashèntnan ku COVID-19. E demas kambernan mester keda disponibel pa kasonan agudo òf di emergensia ku no ta relatá na COVID-19. Tim di kalamidat di CMC ta den último fase di preparashon di SEHOS pa por kuminsá risibí pashèntnan ku no por akapará den CMC entrante e fin di siman aki.
Lo por kuminsá akomodá 30 pashènt na SEHOS i por oumentá e espasio aki te ku 99 pashènt. E proseso pa un pashènt ku COVID-19 yega hospital, sea ta pa kuido na CMC òf na SEHOS, ta keda mesun kos. Si un pashènt tin síntoma di COVID-19 e mester tuma kontakto ku dòkter di kas ku lo kanalisá e proseso pa ambulans i CMC si esaki ta nesesario. Tur pashènt lo wòrdu kontrolá na CMC i guiá pa e departamentu konserní na CMC òf na SEHOS.
