CMC ta mehorá e eksperensia di pashènt i famia durante COVID-19

Willemstad, 13 di Aprel 2021 – Curaçao Medical Center (CMC) ta rekonosé e importansia pa konektá ku bo ser kerí den hospital durante su estadia. Alabes CMC ta komprondé kon difísil e regla ku no por risibí bishita por ta pa pashènt i famia durante di e tempu difísil aki. Pa e motibu ei nos a introdusí un inisiativa nobo yamá Keda Konektá pa asina pashèntnan por keda den kontakto durante nan estadia na hospital.

 

Kada pashènt por tin un persona di kontakto ku CMC por keda den kontakto kuné pa duna informashon diario di e salú di pashènt na momentu ku esaki ta nesesario. Enfermeronan lo duna informashon general di e pashènt i e spesialista lo duna mas detaye di e situashon médiko. Nos ta pidi pa kada pashènt tin UN persona di kontakto ku ta responsabel pa informá sobrá famia pa asina evitá ku diferente miembro di famia ta bai yama e departamentu. Komo parti di e programa, por plania yamada telefóniko òf un WhatsApp “video call” ku e miembro di famia.

SOAB, Digicel, ENNIA i Pomp Station Santa Maria a kontribuí na e proyekto aki dor di spònser 20 Tablet, 7 Smartphone, karchi di SIM pa tur e departamentu di kuido.

 

Alabes, nos kier enkurashá famia pa tene kontakto ku e pashènt via nan selular personal. Pero tuma nota ku e pashènt ta den un proseso di rekuperashon, pues nos kier pidi pa limitá e yamadanan na e pashènt ya e pashènt por sosegá su kurpa i tin un pronto rekuperashon. Nos ta pidi pa un miembro di famia por trese e selular di e pashènt huntu ku su kabel di karga i un adapter di 220V (plug rondó) pa karga e selular i keda den kontakto ku e pashènt.

Number di kontakto pa e sentro di “Keda Konektá” ta 745-0045 i ta alkansabel:
Djaluna pa djabièrnè di 8or a.m. – 3or p.m.
Djasabra i djadumingu di 8or a.m. – 12or p.m
e-mail: stayconnected@cmc.cw

Pa entregá òf tuma pertenensia di e pashènt bo por pasa na e “Pick-up & Delivery Center” na entrada wèst di hòspital di djaluna pa djabièrnè di 8or a.m. pa 3or p.m. i riba djasabra i djadumingu di 8or a.m.pa 12or p.m.

Leave a Reply

Your email address will not be published.