WILLEMSTAD, 3 di yüni, 2026 – Aproksimadamente 29 kama na Curaçao Medical Center (CMC) ta aktualmente okupá pa pashèntnan ku a finalisá nan tratamentu médiko pero no por duna di alta (‘ontslag’) ainda pa motibu di e disponibilidat limitá na entre otro kasnan di kuido of ‘hospice’. E okupashon prolongá aki ta kousa un preshon konstante riba e kapasidat di CMC i ta afektá atmishon di pashèntnan nobo. E resultado ta kanselashon di operashonnan i oumento den tempu di espera pa operashon.
Segun Hunta di Direktiva di CMC: “E okupashon kontinuo di kamanan pa pashèntnan ku ta médikamente kla pa risibí nan ‘ontslag’ ta un preokupashon grandi. Esaki no ta un problema insidental, sino un preshon struktural riba henter e kadena di kuido, ku konsekuensianan direkto pa e aksesibilidat di kuido agudo i spesialisá. Ora kamanan no ta liber na tempu, pashèntnan ku tin mester di kuido ta haña nan konfrontá ku retraso innesesario den nan tratamentu. E problemátika aki ta eksigí akshon inmediato i koordiná den henter e sistema di kuido pa restorá un fluho di pashènt ku ta sigur i responsabel.”
Tin algun pashènt ta kedando den hòspital pa periodonan largu, den sierto kasonan pa lunanan largu, apesar ku nan ta médikamente kla pa sigui. CMC a publiká un episodio di podcast, “Puntra un Eksperto,” kaminda e Mènedjer di e Departamentu di Planifikashon di Kapasidat i un enfermera di e Departamentu di Onkologia ta bai mas den detaye riba e impakto di e okupashon di kama riba e fluho i kuido di pashènt.
E podcast ta disponibel via Facebook: Curaçao Medical Center – Fecha di publikashon: 3 di yüni 2026.
