Willemstad, 12 di mart 2026 – E sifranan ta konta un historia preokupante, pero e berdadero impakto di diabétis ta den bida di hende. Despues di e atvertensia di siman pasá tokante diabétis bou di mucha, Curaçao Medical Center (CMC) ta pidi atenshon pa e kosto humano di diabétis no kontrolá, komplikashonnan serio ku ta afektá pashèntnan, famianan i e komunidat en general.
Entre 2020 i 2025, mas ku 300 persona pa aña na Kòrsou mester a dialisá. Diálisis ta mantené hende na bida ora ku nan nir stòp di funshoná debí na diabétis pa hopi aña. Kada pashènt ta pasa oranan largu den hòspital, vários biaha pa siman, ahustando nan bida rondó di un mashin ku ta yuda tene nan na bida.
Diabétis tambe por kousa amputashon. Na 2024, 58 persona a pèrdè (parti di) nan pia debí na komplikashon. Esei ta mas ku un persona pa siman ku ta enfrentá sirugia ku ta kambia nan bida, mayoria biaha dor di problemanan ku por a wòrdu prevení.
Aún mas alarmante ta e subida di kasonan di diabétis bou di mucha. Den e último 5 añanan, e kantidat di pashèntnan pediátriko na CMC a más ku dòbel. Si nada no kambia den e muchanan aki nan bida tin chèns ku nan lo tin mas komplikashon den futuro.
Un di kada sinku adulto na Kòrsou ta biba ku diabétis. Kombiná ku un poblashon ku ta embehesiendo i un oumento den obesidat, esaki ta pone un karga kada bes mas grandi riba famianan i e sistema di kuido. Aña pasá so, kuido relashoná ku diálisis na CMC a kosta mas ku XCG 16 mion, miéntras ku tratamentunan hiperbáriko pa pashèntnan di diabétis a surpasá XCG 200,000. E figuranan aki ainda no ta inkluí e kostonan signifikante di operashon, atmishon den hòspital, remedi di tur dia i otro tratamentunan spesialisá. Mas leu ku e impakto finansiero, diabétis ta konsumí tambe tempu, energia i rekursonan emoshonal, kambiando bida di e pashèntnan i nan famia pa semper.
Mayoria bia bo no ta ripara e promé fase di e malesa di diabétis. E ta krese poko poko, ku influensia di hábitonan diário; aktividat físiko limitá, mal nutrishon i falta di kontròlnan médiko. Pa ora ku komplikashonnan serio aparesé, e malesa hopi ya ta progresando pa añanan kaba.
Esaki no ta un historia pa krea spantu, pero pa konsientisasá, krea responsabilidat i akshon. Kada pashènt di diálisis i kada amputashon ta reflehá añanan di chènsnan pèrdí pa prevení komplikashon. Pasonan simpel manera ‘screening’ regular, kome saludabel, ehersisio, ‘follow-up’ médiko trempan i responsabilidat kompartí den famianan i lugá di trabou por hasi un diferensia real.
CMC ta pidi tur hende: famianan, skolnan, dunadó di trabou, dunadó di kuido i lidernan den komunidat pa bòltu konsientisashon den akshon. Prevenshon ta kuminsá pafó di hòspital: den kushinanan, na skolnan, lugá di trabou i barionan tur dia.
Diabétis no ta solamente un problema di salú, e ta un desafio sosio-ekonómiko. Programanan di prevenshon trempan, inisiativanan di salú na skol i trabou, i kampañanan pa henter komunidat ta invershonnan ku ta salba bida, redusí gastunan di kuido a largu plaso i protehá Kòrsou su futuro. Laga nos aktua awor pa redusí sufrimentu, protehá famianan i baha gastu pa sosiedat promé ku mas bida kambia pa semper.
