WILLEMSTAD, 1 di febrüari 2024 – Curaçao Medical Center [‘CMC’] a tuma nota di e karta di Inspektor General di Salubridat ku a ser mandá pa Minister di Finansa i Salubridat, Medio Ambiente i Naturalesa, señor Javier Silvania, den kual Inspektor General di Salubridat, Dr. S.O. Keli, MD, PhD, ta indiká su konklushon basá riba su investigashon den un kaso lamentabel di fayesimentu di un pashènt na CMC na mart 2021. Mediante e komunikado akí CMC ta distansiá su mes kompletamente for di e konklushon di Inspektor General di Salubridat.
E konklushon manera indiká i deskribí den e karta publiká pa Minister Silvania riba medionan sosial ta kompletamente inkorekto. Tantu e komishon di keho i e Kolegio Disiplinario Médiko independiente, despues di investigashon ekstenso a konkluí ku e pashènt no a ser atministrá ku líkido tóksiko i fayesimentu di e pashènt ta debí na kousa natural. Esaki ta ser konkluí tambe den e rapòrt di outopsia i tambe den e rapòrt toksikológiko.
CMC ta na altura di e seriedat di e situashon i ta urgi públiko pa ta sigurá ku investigashon ekstenso [‘due diligence’] a ser siguí korektamente. CMC ta lamentá ku e Inspektor General di Salubridat ta trese dilanti akusashon infundá, den un karta i un rapòrt final. Desafortunadamente, e alegashonnan serio akí a impulsá CMC pa evaluá e posibilidat di tuma medidanan legal adishonal. Despues di e komunikado ofisial akí, debí na e konfidensialidat di e kaso en kuestion, CMC no por komuniká mas tokante e kaso.
