Willemstad, 19 di yanüari 2024 – Ku orguyo, Curaçao Medical Center [‘CMC’] ta anunsiá su logro inovativo komo e promé hòspital den region di Karibe pa ofresé ”Percutaneous Transforaminal Endoscopic Discectomy (PTED)”, un sirugía mínimo invasivo di hernia na kolumna vertebral. E echo médiko memorabel akí ta un punto kulminante di CMC su esfuerso den ofresé opshon di sirugíanan avansá i mínimo invasivo na su pashèntnan.
E ehekushon di e promé sirugía a tuma lugá 16 di yanüari 2024, bou di guía kapasitá di Dr. Dos Santos Rubio den kolaborashon ku Dr. Harhangi i e tim di sirugía di CMC i Park Medisch Centrum (Rotterdam). Na Hulanda Dr. Harhangi tin un “background” eksepshonal riba tereno di sirugía pa hernia i su ekspertísio tabata di gran balor den krea e oportunidat pa e sirugía “state-of-the-art” akí na Kòrsou.
Sirugía di kolumna vertebral mínimo invasivo pa hernia, mihó konosí komo, ”Percutaneous Transforaminal Endoscopic Discectomy (PTED)”, ta un téknología avansá ku ta ofresé benefisionan signifikante en komparashon ku sirugía tradishonal. Un kòrtá chikí ta wòrdu hasí i un endoskopia (un kámara pegá na un pipa fini i rígido) ta ser insertá, asina pèrmitiendo e siruhano pa opservá e hernia i e área alrededor riba un pantaya. Instrumento di sirugía spesialisá ta ser usá pa kita e hernia for di e parti abou di e kolumna vertebral. E sirugía mínimo invasivo akí normalmente ta dura mas o menos 30 minüt.
Kompará ku operashonnan konvenshonal, Dr. Harhangi i miembronan di e grupo di investigashon di PTED a demostrá ku e sirugía akí ta redusí e grandurá di e kòrtá, kual ta minimalisá chèns di sikatris i ta duna espasio pa rekuperashon mas rápido. Pues pashèntnan por regresá kas riba e mesun dia. Mas aleu, e método inovativo akí ta resultá den menos doló despues di operashon i un eksperensia ameno di pashènt. E estudio a ser publiká den e revista médiko Britániko kual ta un di e lídernan di revista mediko den área di medisina.
E nifikashon di e logro akí pa CMC ta bira aún mas impreshonante mirando e echo ku na Hulanda solamente sinku (5) klínika médiko ta ofresé e tipo di sirugía akí aktualmente. CMC su ròl pionero den Karibe ta representá un gran paso dilanti den e área médiko di region, asina revolushonando e manera ku hernia na kolumna vertebral ta ser tratá.
