Willemstad 9 di yüni, 2023 –Kushina sentral Curacao Medical Center a risibí un bishita no-anunsiá di
inspektor di salú pa evaluá si e kushina ta funshoná konforme e standardnan di higiene i seguridat di
kuminda. E inspekshon a konkluí ku e kushina sentral di e hòspital ta kumpli ku tur rekerimentunan di
higiene i seguridat. E inspektor a ekspresá ku e ta enkurashá CMC pa kontinuá ku su proseso aktual pa
optené e akreditashon rekonosé mundialmente di JCI.
Komo parti integral di sistema di kuido di salú, CMC ta komprondé e ròl kritiko ku higiene di kuminda ta
hunga pa garantisá bienestar i seguridat di pashèntnan, bishitantenan i personal. Kushina sentral, ku ta
responsabel pa prepará i entregá kuminda na pashèntnan, tin e kompromiso pa mantené e nivelnan mas
haltu di seguridat di kuminda.
Durante e bishita no-anunsiá, e inspektor di salú a analisá na manera serio diferente aspektonan di
operashonnan di e Kushina sentral, manera almasenashon di kuminda, maneho, preparashon i limpiesa
general. E proseso di inspekshon a envolví protokòlnan di higiene, práktikanan di personal i si kushina ta
konforme reglanan lokal.
E evaluashon ku a keda realisá pa e inspektor di salú a konkluí ku Kushina sentral di CMC ta kumpli, ku e
standardnan di inspekshon di higiene i seguridat alimentisio. E logro aki ta reflehá e kompromiso di e
hòspital pa mantené un ambiente limpi i sigur pa pashèntnan i personal.
E resultadonan positivo di e inspektor no solamente ta validá e esfuersonan kontinuo di e hospital, pero ta
sirbi komo un katalisado pa sigui mehorá. CMC ta mantené su kompromiso pa mehorá su práktikanan di
higiene i seguridat alimentisio pa asina sigurá e nivel mas haltu di kuido i servisio.
CMC ta agradesé e tim dediká di Kushina sentral pa nan kompromiso di mantené protokòlnan di higiene i
seguridat alimentisio. Nan profeshonalismo a hunga un papel instrumental den e logro aki.
Hòspital ta keda firme den su kompromiso pa mantené e standardnan di mas haltu den tur aspekto di di
salubridat. CMC lo sigui traha duru pa por brinda un servisio ehemplar den na pashèntnan, bishitanan I tur
miembro di personal.
