Willemstad, 27 yüli 2023 – Dia 26 di yüli 2023, Korte a duna sentensia den kasonan di of Curaçao Medical Center (CMC) kontra Minister GMN (Sr. Drs. J.F.A. Silvania) relashoná ku e presupuestonan di kuido pa e periodonan di 15 novèmber 2019 – 31 desèmber 2020 i 1 yanüari – 31 desèmber 2021.
Den kuadro di esaki korte a deklará e siguiente puntonan na fabor di CMC.
Minister no a inkorporá e gastunan definitivo di transishon i e inisio di CMC den e presupuesto di kuido, òf no a tuma niun akshon pa hasi esaki. Wes a dikta ku Minister mester tuma otro desishon (korekshon di e “beschikking”) riba esaki. Den e desishon aki minister mester inkluí e gastunan mará na e akreditashon di CMC tambe. Aparte di esei, minister mester kalkulá un depresiashon di 2,5% riba e edifisio di hòspital na lugá di 2%. Ademas, minister mester inkorporá un suma di NAF 3,6 mion den e presupuestonan di kuido pa gastunan di interes. Den e presupuesto di kuido di aña 2020 minister a apliká un deskuento pa aparatonan i materialnan médiko di NAF 0,4 mion inhustamente, esaki mester wòrdu koregí.
Den término finansiero, e setensia di Korte segun CMC ta nifiká ku e presupuestonan di kuido mester subi ku aproksimadamente NAF. 50 pa NAF. 60 mion (NAf. 25 pa 30 mion pa aña), dependiendo di e sistema di transishon i inisiashon ku ta bai uza. E montante aki ta adishonal na e suma di NAF. 16.9 mion – den kuadro di e 12,5% di deskuento riba e kondishonnan laboral – ku Korte di promé instansia a deklará inbálido. E montantenan aki ta separá di e kompensashon di NAF 19.6 mion ku gobièrnu di Kòrsou a otorgá na CMC relashoná ku e gastunan di kuido duná na personanan indokumentá den e añanan anterior.
Minister Silvania lo entregá presupuestonan di kuido nobo den 3 luna, teniendo kuenta ku e deklarashon di korte. Despues di esei SVB lo paga e suma èkstra. E sentensia di korte aki C, lo tin influensia riba e presupuestonan di kuido di aña 2022 i e añanan ku ta sigui. Esaki ta konta tambe pa e gastunan di personanan indokumentá ku gobièrnu di Kòrsou a rekonosé anteriormente.
No tin posibilidat di apelashon kontra e deklarashonnan di korte. CMC ta habrí pa den un bon diálogo ku gobièrnu di Kòrsou, yega na akuerdonan konforme e sentensia di Korte i ta keda buska diálogo ku e partidonan konserní.
CMC a keda asistí den e kasonan aki pa e abogadonan mrs. E.R. de Vries i P. Blom di e bufeto di abogado HBN Law & Tax.
