Willemstad, 25 di yüli 2023 – Hunta di direktiva di Curaçao Medical Center (CMC) a tuma nota di informashonnan inkorekto tokante e departamentu di planifikashon di kapasidat. Den kuadro di esei Hunta di direktiva di CMC ke informá nos pashèntnan i pueblo di Kòrsou en general kon e proseso di planifikashon di operashon ta hinká den otro.
E proseso di planifikashon di operashon ta un kooperashon entre e departamentu di planifikashon di kapasidat i e médikonan spesialista. E proseso ta hinká den otro na e siguiente manera: e médiko ta determiná si un pashènt ta bini na remarke pa hasi un operashon i den kua periodo e pashènt lo mester hasi e operashon. Na momentu ku e médiko determiná esakinan, e ta pone e departamentu di planifikashon di kapasidat na altura. E departamentu ya menshoná na su turno ta plania e operashon i no ta determiná ken si òf ken nota operá.
Situashon aktual
Akualmente CMC ta konfrontando un situashon di skarsedat di personal di sala di operashon. Debí na e situashon aki,solamente 3 pa 4 kamber di sala di operashon ta operashonal por lo pronto. Den kuadro di esaki, e departamentu di planifikashon di kapasidat ta tuma kontakto ku e médikonanpa sa kua pashènt lo haña preferensia pa operá. Seguidamente, e médiko for di su responsabilidat lo informá e pashènt di esaki. Hunta di direktiva di CMC ta enfatisá ku tur kaso di emergensia ta haña preferensia semper. Departamentu di planifikashon ta simplemente koordiná i fasilitá esnan ku a wòrdu selektá pa operashon.
Hunta di direktiva di CMC ta sigui hasi su máksimo esfuerso pa solushoná e problemátika di skarsedat di personal di sala di operashon i ta konta ku koperashon di su pashèntnan ikomunidat di Kòrsou den esaki.
