Willemstad, 6 yüli, 2023, – Curaçao Medical Center (CMC) kier reakshoná riba desaroyonan resientemente relashoná ku e instrukshonnan (aanwijzingen) emití pa inspektor di Kuido i Salú, Prof. Dr. Sirving Keli.
Apesar ku CMC no por konsentí kompletamente ku e kontenido di e instrukshonnan impuesto, gerensia di hòspital a disidí pa no tuma akshon legal i na lugá di esei duna prioridat na komunikashon abierto i kolaborashon. Den kumplimentu di e kompromiso aki, CMC lo tin reunion tur siman ku Inspektor General, pa sigurá ku tur informashon nesesario ta wòrdu entregá na tempu. E meta ta pa solushoná puntonan di atenshon menshoná den e instrukshonnan mas pronto posibel, pa por retirá e instrukshonnan mas pronto ku ta posibel.
CMC ta rekonosé e papel vital di Inspekshon pa Salubridat pa mantene e normanan di salú i garantisá e bienestar di e pashènt. Manera un instansia dediká na kuido di pashènt, CMC ta kompletamente dediká na kolaborashon estrecho ku Inspektor di Salú, Prof. Dr. Keli pa retirá kualkier problema identifiká efektivamente.
CEO di Curaçao Medical Center, Gilbert Martina, a deklará: “E bienestar i seguridat di nos pashèntnan ta nos prioridat mas grandi. Ounke por tin perspektivanan diferente, nos ta kere ku diálogo abierto i kolaborashon ta esensial pa eliminá kualkier preokupashon di Inspektor di Kuido i Salú. Nos ta determiná pa traha aktivamente ku Prof. Dr. Keli i su tim pa retirá e instrukshonnan i garantisá e normanan mas haltu di kuido di salú na CMC.”
E profeshonalnan dediká den salú di CMC ta keda firme den duna kuido médiko eksepshonal i mantenshon di e normanan mas haltu pa seguridat di pashènt.
